Júrgizýshi kýáliginen aıyrylǵan Taraz turǵyny 1 jyldaı qoǵamdyq kólikti aıdap kelgen
TARAZ. QazAqparat – Jambylda «Avtobýs» jedel-aldyn alý is-sharasy barysynda polıtseıler júrgizýshi kýáliginen aıyrylsa da qaladaǵy №43 marshrýttyq avtobýsty aıdap júrgen 25 jastaǵy júrgizýshini anyqtady, dep habarlaıdy QazAqparat tilshisi.
Anyqtalǵan júrgizýshi 2018 jyldyń sońynda qarsy qozǵalys jolaǵyna shyǵyp, jol erejesin buzǵany úshin kólik júrgizý quqyǵynan aırylǵan. Alaıda ol týraly jumys ornyna habarlamaǵan.
Júrgizýshi kýáliginsiz júrgen azamat kúndelikti tasymal barysynda syrtqy jaryǵy joq kólikti basqaryp júrgendigi belgili bolǵan. Sonymen qatar, ol osyǵan deıin jol erejesin buzǵany úshin segiz ret ákimshilik jaýapkershilikke tartylypty.
«Osy júrgizýshige qatysty eki hattama toltyryldy. Ol boıynsha QR Ákimshilik quqyq buzýshylyq týraly Kodeksine oraı 3 aılyq jáne 30 aılyq eseptik kórsetkish mólsherinde aıyppul qarastyrylǵan. Onyń basqarýyndaǵy qoǵamdyq kólik arnaıy aıyppul turaǵyna qoıyldy», - dedi Taraz qalasy ІІB patrýldik polıtsııa batalony komandıriniń orynbasary, polıtsııa kapıtany Nurjan Kerebaev.
Sondaı-aq, jol-tehnıkalyq ınspektsııa bóliminiń mamandary osy marshrýttyq avtobýstyń tehnıkalyq jaǵdaıy men paıdalanylýyna, jol qozǵalysy qaýipsizdigin qamtamasyz etý erejelerin oryndamaǵany úshin jaýapty jeke kásipker de ákimshilik jaýapkershilikke tartylǵandyǵyn aıtady.
