Júrgizýshi kýáligin alýǵa emtıhannan súrinbeı ótetinder sany kúrt azaıdy – Baǵdat Mýsın
Bul týraly búgin óziniń Facebook paraqshasynda QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jazdy, dep habarlaıdy QazAqparat.
«Brıfıng barysynda jýrnalısterge avto HQKO qyzmetin tekserý úshin qyrkúıekte jasyryn, ıaǵnı qarapaıym klıent retinde júrgizýshi kýáligin alýǵa baryp, biraz zańsyzdyqtarǵa tap bolǵanymdy aıtqan edim. Keıin osy tekseristiń nátıjesimen bólisýge sóz berdim.
«Azamattarǵa arnalǵan úkimettegi» ishki qaýipsizdik qyzmetiniń mamandary jasaǵan vıdeonyń negizinde osy mańyzdy másele boıynsha shuǵyl is-sharalar qolǵa alyndy.
Qazirgi tańda memlekettik korporatsııadaǵy áriptesterim kúlli el boıynsha baqylaý jumystaryn kúsheıtkendikten, mundaı jaǵdaılar basqa da aımaqtarda anyqtalyp jatyr.
Bul baǵyttaǵy barlyq materıaldar quqyq qorǵaý organdaryna joldanady.
Tekseris bastalǵannan beri kúndelikti statıstıkaǵa kóz júgirtip otyramyn. «Pravaǵa» praktıkalyq jáne teorııalyq emtıhandy sátti tapsyrǵandardyń sany birden azaıǵanyn baıqaýǵa bolady. Máselen, Nur-Sultan qalasynda sońǵy eki aptada júrgizýshi kýáligin alý boıynsha 2160 ótinish túsken, sonyń ishinde tek 30 adam ǵana synaqtan súrinbeı ótken.
Aldaǵy ýaqytta barlyq mamandandyrylǵan HQKO-da teorııalyq emtıhandy tapsyrý kezinde tulǵany arnaıy bıometrııalyq taný júıesin engizemiz»,-deıdi mınıstr.
Onyń sózinshe, bul júıe synaqqa kelgen adamnyń jeke tulǵasyn anyqtap, test tapsyrýshylardy kezdeısoq orynǵa jaıǵastyrýǵa múmkindik beredi. Ár jumys ornyna kamera ornatylady. Mundaı júıe qazir pılottyq tártipte qoldanylyp jatyr.
«Eger siz memlekettik korporatsııa qyzmetkerleri tarapynan sybaılas jemqorlyq áreketterin baıqasańyz nemese basqa da zańbuzýshylyqtarǵa tap bolsańyz, +7 700 710 14 14, 8 (7172) 95 51 14 senim telefondaryna habarlasyńyz»,-delingen habarlamada.