Júrgizýshi kýáligin alý úshin medıtsınalyq kómek kórsete bilý mindetteledi

NUR-SULTAN. QazAqparat - Qazaqstanda júrgizýshi kýáligin alý úshin alǵashqy medıtsınalyq kómek kórsetý daǵdylaryn bilý mindetti bolmaq. Mundaı mindet «Halyq densaýlyǵy jáne densaýlyq saqtaý júıesi týraly» kodeks jobasynyń jańa redaktsııasynda qarastyrylǵan, dep habarlaıdy QazAqparat tilshisi.

«Kólik júrgizý káligin alý úshin aldymen arnaıy alǵashqy medıtsınalyq kómek kórsetý kýrsynan ótip, sertıfıkat alý qajet. Sodan keıin ǵana kólik júrgizý kýáligi beriledi. Bul mindetti. Sebebi, kóp jaǵdaıda jol apaty bolǵan kezde azamattarymyzdyń basym bóligi, 60 paıyzǵa jýyǵy alǵashqy medıtsınalyq kómekke muqtaj bolady. Ókinishke oraı, medıtsınalyq kómek kórsete alatyndardyń úlesi 3-5 paıyzdan aspaıdy», - dedi Májiliste atalǵan kodeks jobasyn tanystyrǵannan keıin BAQ ókilderine suhbat bergen Densaýlyq saqtaý mınıstri Eljan Birtanov.

Onyń atap ótýinshe, jol-kólik apaty oryn alǵan jerge jedel járdem kóliginiń jyldam barýy qıyn bolatyn jaıttar kezdesedi. Sol kezde alǵashqy medıtsınalyq kómek kórsetý kýrsynan ótken ózge júrgizýshiler zardap shekken adamdarǵa kómek kórsetýi tıis.

«Bizde mundaı standartty kýrstar bar. Olar jedel járdem stansalary, sanıtarlyq avıatsııa jáne medıtsınalyq joǵary oqý oryndary bazasynda uıymdastyrylǵan. Sol jerlerge baryp kýrstan ótý arqyly sertıfıkat alýǵa bolady», - dedi mınıstr.