Júrgizýshi kýáligi joq aqtóbelik 6 jasar balany qaǵyp ketti
AQTÓBE. QazAqparat – Aqtóbede jol-kólik apaty jıiledi. Polıtsııa júrgizýshi kýáligi bolmasa da rýlge otyrǵan aqtóbelikti ustady. Ol 6 jasar balany qaǵyp ketti, dep habarlaıdy QazAqparat tilshisi.
«Toyota Camry» avtokóliginiń 18 jastaǵy júrgizýshisi Aqtóbe qalasy B.Momyshuly dańǵylynda jol-kólik apatyna tap boldy. Ol rettelmeıtin jaıaý júrginshiler ótkelinen ótip bara jatqan 6 jasar balany qaǵyp ketti. Jol-kólik oqıǵasy saldarynan 6 jasar bala oblystyq balalar aýrýhanasynyń jansaqtaý bólimine jatqyzyldy. Polıtseıler avtokólik júrgizýshisiniń kólik quralyn basqarýǵa quqyǵy joq ekenin anyqtady. Qazir Qylmystyq kodekstiń «Jol qozǵalysy erejesin buzý» babymen is qozǵaldy.
«Júrgizýshiler únemi jyldamdyqty saqtamaıdy. Árbir ekinshi jol-kólik oqıǵasy osyǵan baılanysty. Bıyl júrgizýshi kýáligi bolmasa da 600-den astam adamnyń rýlge otyrǵany anyqtaldy. Joldardaǵy qaýipsizdik árbir jol júrisine qatysýshynyń jaýapkershiligi men qyraǵylyǵyna baılanysty ekenin este saqtaý qajet», - dedi Aqtóbe oblysy PD bastyǵy Atyǵaı Arystanov.
Aıta keteıik, Aqtóbede jeńil jáne júk kóligi soqtyǵysyp, saldaryna bir otbasynyń tórt múshesi kóz jumdy. Jantúrshigerlik jol apaty Samara-Shymkent tasjolynda boldy.
