«Júrgizýshi, biz ómir súrgimiz keledi» - Qyzylordadaǵy aktsııa
QYZYLORDA.QazAqparat - Qyzylorda oblysynda 1 mamyr - 1 maýsym aralyǵynda «Balalardyń joldaǵy qaýipsizdigi» atty keń aýqymdy aktsııa ótkizilýde,dep habarlaıdy QazAqparat HAA tilshisi.
Mundaǵy maqsat - jazǵy demalys qarsańynda balalardyń jol-kólik oqıǵalary saldarynan jaraqattanýynyń aldyn alý, qaýipsiz jol júrý daǵdylaryn qalyptastyrý. Atalmysh shara jergilikti atqarýshy organdarmen, densaýlyq saqtaý, bilim berý salalarymen, salaýatty ómir saltyn qalyptastyrý jónindegi múddeli azamattyq qoǵam ınstıtýttarmen birlesip uıymdastyrylýda.
Aktsııanyń alǵashqy kúni Qyzylorda qalasynyń mádenıet saıabpaǵynda ótti. 9 mamyr kúni Jergilikti polıtsııa qyzmetkerleri «Ortaq jol» jol qozǵalysy qaýipsizdiginiń qaýymdastyǵy» qoǵamdyq birlestigimen birlesip Jol qozǵalysynyń jas ınspektorlarynyń qatysýymen «Baıaý qozǵal. Balalardyń ómirin saqtaıyq» taqyrybynda aktsııa uıymdastyrdy.
Іs-shara barysynda Jol qozǵalysynyń jas ınspektorlary jol erejelerin saqtaý jáne jolda qaýipsizdikti qamtamasyz etý máselesi boıynsha qala turǵyndaryna túsindirme jumystaryn júrgizip, ata-analar men kólik júrgizýshilerine saýaldar men suraqtar qoıdy.
Shara sońynda «Ortaq jol» jol qozǵalysy qaýipsizdiginiń qaýymdastyǵy» qoǵamdyq birlestigi balalardyń qatysýymen oryn alatyn jol-kólik oqıǵalarynyń aldyn alý, boldyrmaý maqsatynda alystan jaryqqa belgi beretin lenta taǵyp júrýleri kerektigi jóninde keńes bere otyryp, ony balalar men olardyń ata-analaryna taratty.
Sonymen qatar, «Júrgizýshi, biz ómir súrgimiz keledi» degen uranmen jol qozǵalysynyń jas ınspektorlary jaıaý júrginshiler jolaǵyna shyǵyp, júrgizýshiler arasynda nasıhattaý sharalaryn júrgizip, jolda júrý mádenıetin saqtaýǵa, barlyq jol qozǵalysy qatysýshylarynyń qaýipsizdigin qamtamasyz etýge shaqyrdy.
