Júrgizilgen sharalardyń nátıjesinde qylqan japyraqty aǵashtardy kesý jaǵdaılary oryn alǵan joq - ІІD
ASTANA. Jeltoqsannyń 29-y. QazAqparat /Aıdar Ospanalıev/ - «Jańa jylǵa qarsy arnaıy júrgizilgen sharalardyń nátıjesinde ázirge qylqan japyraqty aǵashtardy kesý jaǵdaılary oryn alǵan joq», dep málimdedi búgin Astana qalalyq Іshki ister departamentiniń Qoǵamdyq qaýipsizdik basqarmasynyń bastyǵy Batyrlan Esenbaı jýrnalıstermen bolǵan baspasóz máslıhatynda,
dep habarlaıdy QazAqparat.
Onyń sózine qaraǵanda, qazirgi tańda qylqan japyraqty aǵashtardy kesý men ony saýdalaýdyń aldyn alýǵa barynsha kóńil bólinip otyr. Tabıǵatty qorǵaý, jol polıtsııasy men ýchaskelik polıtsııa qyzmetkerlerinen jedel toptar qurylyp, olar kúndiz-túni reıd sharalaryn uıymdastyrýda. «Atalmysh sharalar barysynda shyrsha satylatyn arnaıy oryndardy tekserýge barynsha kóńil bólingen. Qazir qalada shyrsha satatyn 7 oryn bar, al shyrsha satý quqyǵy 5 zańdy tulǵada bar. Olar «Sýrjıkov», «Súıindikov», «Haıdarov», «Balǵabaev» sııaqty jeke kásipkerler men «Almas-07» jaýapkershiligi shekteýli seriktestigi. Elimizdiń aımaǵyna qylqan japyraqty aǵashtardy zańsyz ákelýdiń aldyn alý maqsatynda jol polıtsııasynyń ókilderi arnaıy «Shep» beketterin uıymdastyrdy», dedi basqarma bastyǵy.
