Júrginshini urǵan «jedel járdem» qyzmetkeri ustaldy
ASTANA. QazAqparat - Pavlodar oblystyq ishki ister departamentiniń qyzmetkerleri júrginshini soqqyǵa jyqqan kúdiktini anyqtady, dep habarlaıdy QazAqparat.
«Kúdikti anyqtaldy, ol - Pavlodar qalasynyń 38 jastaǵy azamaty. Qaladaǵy jeke kásipkerlikterdiń birinde júrgizýshi bolyp jumys isteıdi. Atalǵan fakti boıynsha oqıǵa oryn alǵan kúni-aq QR Qylmystyq kodekstiń «Buzaqylyq» 293-baby boıynsha qylmystyq is qozǵaldy. Qazirgi ýaqytta oqıǵanyń barlyq mán-jaıy, oǵan qatysty basqa tulǵalar anyqtalýda», - dedi departamenttiń baspasóz qyzmetinen.
Baspasóz qyzmetiniń jetekshisi Baıan Maǵzumovanyń sózine qaraǵanda, kúdiktini anyqtaýǵa oqıǵa bolǵan aýdannyń turǵyndary arasynda júrgizilgen suraý sharalary men vıdeokameralar kómegin tıgizgen.
«Qazirgi kúdikti eshqaıda ketpeý týraly tilhat berdi. Onyń qasynda turǵan ekinshi adamnyń aty-jóni anyqtalyp jatyr. Ázirshe zardap shegýshi anyqtalǵan joq. Sondyqtan kúdiktige qatysty jaza zardap shegýshiniń alǵan jaraqatynyń aýyrlyq deńgeıine baılanysty bolady», - dedi ol.
Esterińizge sala ketsek, áleýmettik jelide jedel járdem qyzmetkerleriniń kıimindegi adamdardyń júrginshini soqqyǵa jyqqan vıdeosy taraǵan bolatyn. Sál keıinirek Densaýlyq saqtaý mınıstrligi qyzmettik tekseris júrgizgendigin, jedel járdem stansasy qyzmetkerleriniń tóbeleske qatyspaǵandyǵyn málimdegen edi.
