Júrektiń máńgi soǵyp turýyn qamtamasyz etetin tásil tabyldy
ASTANA. QazAqparat - Adamnyń júregi dúnıege kelgen sátinen bastap, kóptegen jyldar boıy eshbir toqtaýsyz soǵyp turady. Júrek kenetten toqtaǵan boıda problema paıda bolady. Qazirgi medıtsına adamnyń qartaıýyn báseńdetý men júrektiń jumysyn ustap turýdyń barlyq múmkindigin qarastyryp keledi. Degenmen ǵalymdardyń osy saladaǵy sońǵy zertteýleri júrektiń soǵýy jıiligin uzaq ýaqyt boıy ustap turatyn tásil tapqan syńaıly, dep habarlady www.hi-news.ru.
Illınoıs jáne Vashıngton ýnıversıtetteriniń zertteýshileri joǵary sapaly grafıkalyq beınelerdi jáne 3D-baspasyn qalyptastyrý ádisin qoldana otyryp, júrekti qorshap jaýyp turatyn juqa syrtqy membrana tárizdi quraldy oılap tapty. Elektrod qondyrylǵan jasandy membrana perıkard tárizdi júrektiń tabıǵı syrtqy qabatyn jaýyp turatyn qabyq sekildi bolmaq. Bul qurylǵy deneden tys onyń jumysyn ustap tura otyryp, júrekti jaýyp turady. Bul jasalym qoıan júregine tájirıbe retinde jasaldy, dep habarlady brıtandyq The Independent gazeti.
Qurylǵy júrektiń jumysyn baqylap otyrady jáne onyń soǵýynyń buzylýy men toqtaýy belgilerin anyqtap beredi. Qajet bolǵan jaǵdaıda júrek bulshyq etterine elektrlik ımpýlster bere alady. Biraq ol kádýilgi kardıostımýlıatorlardan múldem ózgeshe.
Elektrondty jasandy membrana problemalardy tez baıqap, júrektiń jumys jaǵdaıyndaǵy qyzmetin ustap turýǵa az mólsherde qaırat jumsaıdy. Elektrodtar qarapaıym materıaldardan jasalǵan, olardyń qurylymy membrananyń sozylyp, júrekti jaýyp turýyna múmkindik beredi.
Biraq ta júrektiń ómirin qazirdiń ózinde-aq uzartýǵa bolady eken dep qýanýǵa áli erte. Tehnologııa zerthanalyq jaǵdaıda janýarlardyń júreginde ǵana óziniń tıimdiligin kórsetti. Degenmen birneshe jyldan keıin bul ónertabys adamǵa zor paıda ákeledi deýge úmit bar.
