Júrekpen tańdalǵan kásip: Qamyr ılep, bolat balqytqan qaraǵandylyq jastar
QARAǴANDY. KAZINFORM — Mamandyq tańdaý — adamnyń bolashaq taǵdyryn aıqyndaıtyn mańyzdy qadam. Bul sheshimge otbasy áser ete me, álde júrektiń únin tyńdaǵan durys pa? Kazinform tilshisi Qaraǵandy óńirindegi eki kolledj stýdentimen suhbattasyp, ómirlik joldary eki túrli bolǵanymen, olardy biriktiretin ortaq qasıetti — tańdaǵan kásibine degen shynaıy súıispenshilikti baıqady.
Rázııa Ábdýálı: Qamyrdan ılengen arman
Rázııa Ábdýálı — Qaraǵandy oblysy Shet aýdanyna qarasty Aqsý aýylynan shyqqan kópbalaly otbasynda ósken. On bir balanyń biri. Eki jyl buryn ol Qaraǵandy taǵam jáne servıs kolledjiniń tabaldyryǵyn attap, alǵashqy kúnnen-aq ustazdardyń nazaryna iligipti — eńbekqorlyǵy men daryny birden kózge túsken.
Qazir Rázııa — kolledjdiń belsendi stýdenti ǵana emes, óz isiniń bolashaǵyna senetin jas maman. Jas ta bolsa, naýbaıshylyq pen kondıterlik óner boıynsha sheberlik sabaqtaryn ótkizip júr. Onyń aıtýynsha, birinshi kýrs stýdentteri men qonaqtar aldynda bilim-tájirıbesimen bólisý — búginge deıin jetken jetistikteriniń eń mańyzdylarynyń biri.
— Bala kezimde naýbaıshy bolýdy armandaıtynmyn. Jańa pisken nannyń ıisin erekshe jaqsy kórem. Tań ata uıqydan dál sol ıisten oıanatynbyz. Anam ár kún saıyn tańǵy asqa nan pisiretin. Anashym men úshin úlgi ári eń birinshi ustazym dep aıta alamyn. Kolledjge túsýime de sol kisiniń yqpaly zor, — deıdi Rázııa.
Ol óziniń jasaǵan tańdaýyna esh ókingen emespin deıdi. Qazir boıjetken kásibı sheberligin jetildirip qana qoımaı, kolledjdiń qoǵamdyq ómirine de belsene aralasady. Búginde ol — respýblıka kolledjderiniń úzdik 100 stýdentiniń qatarynda. «Jiger» stýdenttik parlamentiniń «Mádenıet jáne óner» fraktsııasyn basqarady. Túrli mádenı is-sharalardy uıymdastyryp, oqý ornyna shyǵarmashylyq pen jylýlyq syılap júr. Rázııa — kolledjishilik te, oblystyq deńgeıdegi de baıqaýlardyń jeńimpazy.
Máselen, «Meniń otbasym — meniń shejirem» atty baıqaýda júldeli ekinshi oryndy ıelense, aqyn Serik Aqsuńqarulyna arnalǵan shyǵarmashylyq konkýrsta «Men — has saqtyń qara óleńi» nomınatsııasy boıynsha laýreat atandy. 2024 jyly «Qyz tárbıesi — ult tárbıesi» atty oblystyq sharada arnaıy marapatqa ıe boldy. Sonymen qatar, ol «Eńbek. Bolashaq. Damý» forýmynda metsenat ári oblystyq máslıhat depýtaty Asqar Orazbekovtiń grantyn jeńip aldy.
2023 jyly WorldSkills baıqaýynda «kondıterlik is» boıynsha baq synasa, 2025 jyly «naýbaıshylyq óner» baǵyty boıynsha oblystyq kezeńge qatysty.
— Biz bes modýlden turatyn tapsyrmalardy eki kúnde oryndadyq. Qıyn bolmady — ustazdarymyz óte jaqsy daıyndady. Árıne, bala kúnimnen anam úıretken mashyqtar da úlken kómegin tıgizdi, — deıdi ol.
Bolashaqtaǵy armany — týǵan aýylynda óz naýbaıhanasyn ashý.
— Qamyrmen jumys isteý — ekiniń biriniń qolynan kele bermeıdi. Qazaqta «qoly jeńil» degen sóz bar ǵoı. Biz otbasymyzda jeti qyzbyz — báriniń qolynan dámdi, jumsaq nan shyǵady. Bólelerimiz ben nemere ápke-sińlilerimiz de sondaı. Demek, bul — bizdiń áýletke bitken qasıet. Ózimniń naýbaıhanamdy týǵan aýylymda ashý — meniń maqsatym. Ol kún alys emes dep senemin, — deıdi Rázııa senimmen.
Aıbar Jolanov: Aq halattyń ornyna bolatty tańdaǵan bozbala
Aıbar Jolanov — Temirtaýdaǵy Joǵary polıtehnıkalyq kolledjdiń stýdenti. Ol da respýblıkadaǵy úzdik 100 stýdenttiń qatarynan tabylyp otyr. Alaıda Aıbardyń joly Rázııanykinen múlde bólek — ol ıisi ańqyǵan naýbaıhanadan emes, ot pen jalynnyń ortasynan, bolat balqytatyn tsehtan óz ornyn tapqan.
Kolledjge túser kezde Aıbardyń aldynda eki jol turdy: medıtsına nemese metallýrgııa. Tańdaý sońǵysyna tústi — bul sheshimge ákesiniń ómir joly áser etken. Ákesi — 33 jyl boıy metallýrgııa salasynda úzdiksiz eńbek etip kele jatqan tájirıbeli maman.
— Metallýrgııaǵa degen qyzyǵýshylyǵym bala kezimnen bastaldy. Ákem osy salada eńbek etedi, búginde de zaýytta jumys istep júr. Bizdiń qalada bul mamandyq óte qadirli ári suranysqa ıe, — deıdi Aıbar.
2024 jyldyń sáýirinde ol Sike kompanııasy uıymdastyrǵan metallýrgııa boıynsha alǵashqy halyqaralyq olımpıadaǵa qatysty. Baıqaý onyń ózi oqıtyn kolledjde ótti. Oǵan elimizdiń túkpir-túkpirinen stýdentter kelip, domna, aglomeratsııa jáne konverter tsehtarynyń naqty kóshirmeleri sanalatyn trenajerlerde óz sheberlikterin kórsetti.
— Biz alǵashqy kýrstan bastap osy ýchaskelerde tájirıbe jınadyq. Sondyqtan olımpıadada asa qıyndyq týyndaǵan joq, — deıdi ol.
Sol jyly mamyr aıynda Aıbar Balqashta ótken respýblıkalyq «Keıs PTK-2024» konferentsııasyna qatysty. Bul joly ol túrli tústi metalldarmen jumys istep kórdi.
— Buǵan deıin tek qara metalmen jumys istedim. Túrli tústi metaldarmen tanysý — qyzyqty tájirıbe boldy. Degenmen, men úshin bolat — basty tańdaý. Onyń beriktigi meniń ustanymdarymmen úndes, — deıdi ol.
Aıbardyń aıtýynsha, metallýrg bolý úshin eń qajet qasıet — sabyr men tózim.
— Metaldy balqytyp, qalypqa quıý — ońaı is emes. Bul jerde kútýdi, temperatýrany sezinýdi, materıaldyń tabıǵatyn túsinýdi, ýaqytty durys esepteýdi meńgerý kerek. Sabyr — osy kásiptiń negizi, — deıdi ol.
Osyǵan deıin kolledj bitirgenderdiń qansha paıyzy jumysqa ornalasatyny týraly jazǵan bolatynbyz.