Júrekke jasalatyn keıbir operatsııaǵa memleket esebinen 800 myńnan 1,2 mln. teńgege deıin qarjy tólenedi
ASTANA. QazAqparat - Búgin Ortalyq kommýnıkatsııalar qyzmetindegi brıfıngte QR Densaýlyq saqtaý jáne áleýmettik damý mınıstrligi Medıtsınalyq kómekti uıymdastyrý departamentiniń dırektory Gúlnár Qulqaeva júrekke jasalatyn árbir qymbat operatsııa memleketke qanshaǵa túsetindigin aıtyp berdi.
Onyń sózine qaraǵanda, elimizde kardıohırýrgııalyq ortalyqtardyń jelisi tarmaqtalyp uıymdastyrylǵandyqtan, jyl saıyn 10 myńnan astam stenttileý (júrekke jasalatyn operatsııa) jasalady. Bundaı operatsııaǵa memleket esebinen 800 myńnan 1,2 mln. teńgege deıin jumsalady.
Osy oraıda ol kardıohırýrgııalyq aýrýlarǵa qajetti kómek respýblıkalyq bıýdjet esebinen júzege asyrylatyndyǵyn eske salyp ótti.
«Bizde sonymen qatar aortokoronarlyq shýnttaý ár óńirde júrgizilýde. Jyl saıyn 2,8 myń adam osyndaı kómek alady. Bundaı operatsııanyń quny 1,8 mln. teńgeden 2 mln. teńgege deıin»,-dedi G. Qulqaeva.
