Júrekke salmaq túsiretin 6 nárse: ózińizdi tekserip kórińiz
ASTANA. KAZINFORM — Búgin — Dúnıejúzilik júrek kúni. Júrek-qantamyr aýrýlary álemde ólim men múgedektiktiń negizgi sebepteriniń biri bolyp qala beredi. Degenmen olardyń damýyna áser etetin birqatar qaýip faktoryn baqylaýda ustaýǵa bolady.
Mamandardyń aıtýynsha, júrekke salmaq túsiretin negizgi alty faktor bar. Olar — qan qysymynyń joǵary bolýy, temeki shegý, durys tamaqtanbaý, dene belsendiliginiń tómendigi, artyq salmaq jáne qant dıabeti.
Osy faktorlardyń bir bóligi adamnyń kúndelikti ómir saltyna tikeleı baılanysty. Sondyqtan qan qysymy men qandaǵy qant deńgeıin turaqty baqylaý, durys tamaqtaný, kóbirek qımyldaý jáne temekiden bas tartý júrek densaýlyǵyn saqtaýǵa kómektesedi.
Qazaqstanda júrek-qantamyr aýrýlarynyń aldyn alý jáne emdeý baǵytynda jumystar júrgizilip jatyr. Sońǵy bes jylda qanaınalym júıesi aýrýlarynan bolatyn ólim-jitim 35,1%-ǵa, al syrqattanýshylyq shamamen 15%-ǵa tómendedi.
Oń dınamıka bıyl da baıqalady. 2026 jyldyń alǵashqy alty aıynda ótken jyldyń sáıkes kezeńimen salystyrǵanda:
- qanaınalym júıesi aýrýlarynyń syrqattanýshylyǵy 2,4%-ǵa;
- arterııalyq gıpertenzııa 6,7%-ǵa;
- júrektiń ıshemııalyq aýrýy 6,6%-ǵa;
- ınsýlt 2,3%-ǵa tómendedi.
Bul kórsetkishter kardıologııalyq jáne ınsýlttik qyzmetterdi damytýǵa baǵyttalǵan júıeli jumystyń nátıjesi. Qazaqstanda beıindi medıtsınalyq ortalyqtardyń jelisi keńeıip, joǵary tehnologııalyq operatsııalar kóbeıip keledi. Sonymen qatar jedel medıtsınalyq kómek jetildirilip, ınfarkt pen ınsýltti emdeýdiń zamanaýı hattamalary engizilip jatyr.
Degenmen mamandar densaýlyqty saqtaýda adamnyń óz jaýapkershiligi de mańyzdy ekenin atap ótedi.
Ózińizdi tekserip kórińiz: qan qysymyńyzdy jáne qandaǵy qant deńgeıin turaqty ólshep turyńyz, profılaktıkalyq tekserýlerden ótińiz, kúndelikti qozǵalysty kóbeıtińiz, temekiden bas tartyńyz jáne durys tamaqtanýǵa kóńil bólińiz.
Osyǵan deıin elimizde jol apaty, qaterli isikten bolatyn ólim-jitim azaıǵanyn jazǵanbyz.
