«Júrek jylýy»: Láılá Sultanqyzy oqýshyǵa dombyra syılaıtyn boldy

ASTANA. QazAqparat – Tanymal telejúrgizýshi Láılá Sultanqyzy «Júrek jylýy» aktsııasyn qoldap, 2-synyp oqýshysyna dombyra alyp beretin boldy, dep habarlaıdy QazAqparat tilshisi.

«Ózderińiz biletindeı, Prezıdentimiz «Júrek jylýy» atty qaıyrymdylyq aktsııasyna qoldaý kórsetti. Ánýardyń (Jibek Joly telearnasy jańalyqtar qyzmetiniń júrgizýshisi) kómegimen tańdalǵan hattyń ıesi 2-synyp oqýshysy Altynbekten kelipti. «Dombyra úırengim kelip júr, dombyram bolsa ǵoı, bolǵanyn qalaımyn» dep jazypty. Mindetti túrde, Astanaǵa kelgende ózińe úkili dombyrany syılaımyn, balaqaı!», - dep jazdy tanymal telejúrgizýshi Instagram-paraqshasynda.

Sonymen qatar ol qaıyrymdylyq aktsııa estafetasyn áriptesi Aıgúl Múkeıge jáne belgili kaskader Nomad Stunts tobynyń jetekshisi Jaıdarbek Kúnǵojınge joldady.

«Barshalaryńyzdy qaıyrymdylyq jasaýǵa shaqyramyn!», - dedi Láılá Sultanqyzy.

Eske salaıyq, keshe EXPO qalashyǵynda Prezıdent Qasym-Jomart Toqaev «Júrek jylýy» chellendjine bastaý berip, balalardyń hattary salynǵan sandyqtan olardyń alǵashqysyn alyp shyqqan bolatyn. Memleket basshysy hatty oqyp, onyń ıesiniń tilegi oryndalatynyn jetkizdi.

Keıin chellendj Jibek Joly telearnasynyń stýdııasynda jalǵasyn tapty.

Búgin «jaqsylyq sandyǵynan» balalardyń biriniń hatyn MAQSUT NARIKBAYEV UNIVERSITY basqarma tóraǵasy Talǵat Nárikbaev ta alyp shyqqan bolatyn. Ol Alfııa atty qyz balaǵa armandaǵanyndaı tek sporttyq aıaq-kıim emes, júgirýge arnalǵan kıimniń túgel jıyntyǵyn alyp berýge ýáde etti.