Júrek transplantatsııasyna - 5 jyl: Angınanyń ózi júrek almastyrýǵa sebep bolady
ASTANA. QazAqparat - Búgin álem boıynsha alǵashqy júrek transplantatsııasynyń jasalǵanyna 50 jyl tolyp otyr. Al Qazaqstanda ondaı otalardy qolǵa alǵanynymyzǵa bes-aq jyl boldy. Degenmen, osy ýaqytttyń ishinde kardıoxırýrgter júzdegen adamnyń ómirin saqtap qaldy, dep xabarlaıdy QazAqparat tilshisi.
Elimizde júrek almastyrý otalary birneshe jerde jasalady. Solardyń biri - Astanadaǵy Ulttyq ǵylymı kardıoxırýrgııalyq ortalyq. Qazaqstanda alǵashqy júrek transplantatsııasy dál osy ortalyqta jasaldy. 2012 jyldyń 8 tamyzy kúni tańǵy saǵat 8:00-de astanalyq Jánibek Ospanovqa birinshi ota jasaldy.
«Shynymdy aıtsam, birinshi transplantatsııa bolǵannan keıin men qatty qobaljydym, tipti qoryqtym deýge bolady. Degenmen, amalym bolmady. Sebebi burynǵy júregim tek jarty jylǵa ǵana shydaıdy dedi. Al jańa júrekpen aman qalamyn degen senim boldy. Sodan óz kelisimimdi berdim. Ota sátti ótti. Endi, Qazaqstanda júrek almastyrǵan alǵashqy adam bolǵannan keıin maǵan qatty qarady, reabılıtatsııa da uzaqqa sozyldy. Qazir ózimdi jaqsy sezinemin. Sportpen de aınalysamyn. Jaqynda Ispanııaǵa baryp, ózimiz sııaqty sportshylarmen jarysyp, altyn medal da jeńip aldyq. Bul - úlken jetistik. Biz úshin, dárigerler úshin úlken nátıje. Árıne, donorlarǵa aıtar alǵysymyz sheksiz. Olar bolmasa, qazir osy jerde turmaıtyn edik», - dedi Jánibek Ospanov búgin Astanada ótken merekelik sharada.
Onyń aıtýynsha, júrek aqaýlyǵy kádimgideı angınadan bastaldy. Tamaq aýrýy aldymen artrıtke, odan keıin revmatızmge ulasyp, artynan júrekke de keri áserin tıgizgen.
Bes jyldyń ishinde Ospanovtar otbasynda eki bala dúnıege keldi. Qazirgi kezde Jánibek «Ómir tynysy» qoǵamdyq birlestigine jetekshilik etedi. Atalǵan uıym retsıpıentterdiń, ıaǵnı júrek aǵzasyn kútip júrgen adamdarǵa salaýatty ómir saltyn ustanýǵa kómektesedi.
Búgingi sharaǵa Galına Vorotnıkova, Tatıana Jaqypova, Asqar Musaldın, Petr Frolenko syndy donorlardyń týǵan-týystary da qatysty. Atalǵan adamdar osy jaryq dúnıemen qoshtassa da, óz aǵzalaryn berip, basqa adamdardyń ómirin uzartty.
«Asqar balam jumysqa bara jatqanda qatty qulaǵan. Basyn bordıýrge soǵyp, talyp qalǵanda ótken-ketken adam ony mas dep oılaǵan. Biraz ýaqyttan soń, mekteptiń kúzetshisi kórip, mılıtsııaǵa da, jedel járdemge de xabar bergen. Aýrýxanada tórt saǵat boıy ota jasady. Biraq balam komaǵa ketip qaldy. Artynan bizdi dárigerler shaqyryp, donorlyqqa kelisesiz be dep surady. Biz kelistik. Sodan júrek, búırek, baýyr men ókpesin alyp, tórt adamǵa salyp berdi», - deıdi Orynjan Qospanova.
Aıta keteıik, sońǵy bes jyldyń ishinde Ulttyq ǵylymı kardıologııalyq ortalyqta kásibı maman ıÝrıı Pıanyń jetekshiligimen 60-qa jýyq adamnyń júregin almastyrý otasy jasaldy.
