Júrek operatsııasy AQSh-tan 80 ese arzan – Qazaqstanǵa 7 myń naýqas em alýǵa kelgen
Sheteldik patsıentter arasynda karıohırýrgııa, neırohırýrgııa, stomatologııa jáne ekstrakorporaldi uryqtandyrý qyzmetteri suranysqa ıe. Bul týraly «Astana damý ortalyǵy» JShS medıtsınalyq týrızmdi damytý jónindegi basqarýshy dırektory Darına Demıan aıtty, dep habarlaıdy Kazinform.
Kazakh Tourism dereginshe, 2021 jyly Qazaqstanǵa 5 myńnan astam medıtsınalyq týrıst kelgen.
Al 2022 jyly shamamen 7 myń adam kelgen.
«Sheteldik kelýshilerdiń 90% - Reseı, Qyrǵyzstan jáne Ózbekstan azamattary, qalǵan 10% - Qytaı, Iran, Belarýs elderinen kelgen. Qazaqstandyq medıtsına uıymdarynyń negizgi artyqshylyqtary – zamanaýı medıtsınalyq tehnologııalarǵa jáne jańa tehnologııalarǵa qol jetkizý, sapa standarttary, medıtsınalyq qyzmetterdiń qolaıly quny, TMD elderiniń azamattary úshin tildik kederginiń bolmaýy, damyǵan týrıstik ınfraqurylymnyń bolýy», - dedi D. Demıan Astana qalasynyń kommýnıkatsııalar qyzmetinde.
Onyń aıtýynsha, qazaqstandyq medıtsına týraly jergilikti halyq pen sheteldikter arasynda áli de aqparat az, bul patsıentter aǵynyn arttyrýǵa kedergi bolyp otyr.
«Baǵa boıynsha salystyrmaly taldaý jasasaq, júrekti shýnttaý hırýrgııasy AQSh-qa qaraǵanda 80 ese arzan, Sıngapýrǵa qaraǵanda 11 ese arzan. Jambas urshyǵyn aýystyrý – AQSh-qa qaraǵanda 19 ese arzan, Sıngapýr men Taılandqa qaraǵanda bes ese arzan. QR DSM málimetinshe, elde baǵasy arzan bolǵany úshin 5 baǵyt suranysqa ıe: karıohırýrgııa, neırohırýrgııa, býyn protezderi, stomatologııa jáne ekstrakorporaldi uryqtandyrý (EKO)», - dedi spıker.
Búgingi tańda Qazaqstanda medıtsınada «altyn standart» sanalatyn JCI halyqaralyq akkredıtatsııasyn alǵan 9 klınıka bar, onyń jeteýi Astanada ornalasqan.
Bul klınıkalarda dıagnostıkadan bastap, joǵary tehnologııaly medıtsınalyq qyzmetter men kúrdeli otalardy jasaýǵa bolady.
«QR Tis dárigerleri qaýymdastyǵynyń habarlaýynsha, bizdiń elge em alýǵa eýropalyq elderdiń azamattary jıi keledi. Óıtkeni stomatologııalyq qyzmetter quny Eýropamen salystyrǵanda 10-15 ese arzan jáne sapasy esh kem túspeıdi. Ásirese sheteldikter arasynda plombalaý, ımplanttaý, protezdeý jáne balalar stomatologııasy baǵyttary jıi suralady», - deıdi Darına Demıan.
Taǵy bir perspektıvaly baǵyttardyń biri - ekstrakorporaldy uryqtandyrý.
«Álemde dál osy medıtsınalyq qyzmetke suranys artyp keledi. 2022 jyly astanalyq emhanalarǵa EKO jasatýǵa Qyrǵyzstannan 900 adam, Ózbekstannan 254 adam, Reseıden 92 adam kelgen. Óıtkeni bizdiń elde bul qyzmet shamamen 2-2,5 myń AQSh dollary bolsa, Eýropada 15 myń dollar, AQSh-ta 19 myń dollar turady», - dep túsindirdi «Astana damý ortalyǵynyń» ókili.
Buǵan deıin Darına Demıan jyl saıyn 50 myń qazaqstandyq em alý úshin shet memleketterge baratynyn aıtqan edi.
Saldarynan Qazaqstannyń medıtsınalyq qyzmetter naryǵy jylyna 200 mln AQSh dollaryna deıin ekonomıkalyq paıdasyn joǵaltyp otyr.
