Júrek-qan tamyrlary aýrýlary barlar COVID-19-ǵa qarsy ekpe alýy kerek - kardıolog
PETROPAVL. QazAqparat – Soltústik Qazaqstan oblystyq kóp salaly aýrýhananyń kardıologııalyq blok jetekshisi Maqsat Qudrattollaev júrek-qan tamyrlary aýrýy barlarǵa koronavırýsqa qarsy ekpe alýǵa keńes beredi. Óıtkeni qaýipti ınfektsııa kóp jaǵdaıda trombozdyq asqynýlarǵa alyp keledi, dep habarlaıdy QazAqparat tilshisi.
Kardıolog dáriger Maqsat Qudrattolaevtyń aıtýynsha, júrek-qan tamyrlary aýrýlary negizinen júre kele paıda bolatyn dert. Sondyqtan syrqattardyń basym bóligi derlik egde jastaǵy adamdar. Saldary aýyr dert jeńil ótýi úshin koronavırýsqa qarsy vaktsına alý mindetti.
«Kardıologııalyq aýrýlary barlarǵa koronavırýsqa qarsy vaktsına alýǵa bolady. Ekpe qoıǵyzýǵa qarsy kórsetilim joq. Keı syrqattarda koronavırýstan keıin kardıologııalyq aýrýlary asqynady. Sol sebepti jasy 60-tan asqandar mindetti túrde vaktsına qoıdyrýy qajet. Al vaktsına almas buryn kez-kelgen adam terapevten ótýi kerek. Kardıologııalyq syrqattar únemi dári-dármek ishedi. Bizde esepte turǵandar da dárigerge kórinip, ekpe almas buryn qandaı dári-dármek qabyldaıtynyn aıtýy qajet. Jaǵdaıy jaqsy bolsa vaktsına qoıdyrýǵa ruqsat beriledi», - deıdi oblystyq kóp salaly aýrýhananyń kardıologııalyq blok jetekshisi Maqsat Qudrattollaev.
Qazirgi ýaqytta ortalyqqa josparly túrde emdelýge jatatyndar negizinen PTR-testtiń qorytyndysymen nemese vaktsınatsııa pasportymen keledi. Al mártebesi anyqtalmaǵan syrqattar aldymen tekserýden ótedi.
«Aýyr halde, máselen, ınfarkt alyp, jedel járdem qyzmetimen túsetin syrqattar bar. Olardy qabyldaý barysynda birden PTR-test alamyz. Mundaı syrqattar mártebesi anyqtalǵanǵa deıin oqshaýlaý bólimshesine ornalastyrylady. Kelesi kúni test nátıjesine qaraı em-domdy bastaımyz. Eger de juqtyrǵan bolsa, onyń jaǵdaıyna qaraımyz. Bul ýaqytta kardıologııalyq emdeý júrgizile beredi. Eger de jaǵdaıy ortasha nemese aýrý jeńil ótse, ózimizde qaldyramyz. Koronavırýstyń asqynǵan túri bolsa, ınfektsııalyq statsıonarǵa aýystyrylady. Syrqatty sol jerde vırýstan jáne kardıologııalyq aýrýlardan qatar emdeıdi. KVI-dy juqtyrmaǵan bolsa, onda bólimshege qabyldanyp, tıisti em-dom qoldanylady», - deıdi kardıolog dáriger.
Dárigerler aqpan aıynda alǵashqylardyń biri bolyp koronavırýsqa qarsy ekpe aldy. Qazir revaktsınatsııanyń bastalýyn kútip otyr. Óıtkeni vaktsınanyń áseri 6-9 aıdan keıin tómendeı bastaıdy eken.
«Qazir biz syrqattarymyzǵa vaktsınatsııadan ótý qajettigin aıtyp jatyrmyz, óıtkeni tájirıbe kórsetkendeı, qaýipti ınfektsııa juqtyrǵan naýqastarymyzda trombozdyq asqynýlar jıi baıqalady. KVI juqtyrǵan ortalyqqa túsisimen-aq biz aldymen osy trombozben kúresti bastaımyz. Óıtkeni onyń saldary aýyr. Qannyń uıyǵyshtyǵy buzylyp, ımplanttalǵan stendter, taǵy da basqa qoıylǵan qurylǵylar bitelip qalýy múmkin. Sol sebepti biz syrqattarymyzǵa vaktsınatsııanyń ne úshin qajet ekenin túsindiremiz. Negizgi aýrýlary asqynyp ketpeý úshin qajet, eger de júrek-qan tamyrlary aýrýyna koronavırýs qosylatyn bolsa, jaǵdaı ýshyǵyp, sońy ólimmen aıaqtalýy múmkin. Vaktsınatsııa ózimizdi qorǵaý úshin kerek. Koronavırýs bizdiń ómirimizde bolady, ol eshqaıda ketpeıdi. Bizde oǵan ujymdyq ımmýnıtet paıda bolmaıynsha, qater tóndire beredi», - deıdi Maqsat Qudrattolaev.
