Júrek aýyratyndarǵa medıtsınalyq ońaltý múmkindiginshe erte bastalýy tıis - dáriger
ALMATY. QazAqparat- Almatydaǵy Kardıologııa jáne ishki aýrýlar ǵylymı-zertteý ınstıtýtynda emdeý jáne medıtsınalyq ońaltýmen mamandandyrylǵan kardıologııalyq jáne terapevtik medıtsınalyq kómek kórsetiledi, dep habarlaıdy QazAqparat tilshisi.
Instıtýttyń basqarma tóraıymy, medıtsına ǵylymdarynyń doktory, professor Roza Qýanyshbekovanyń aıtýynsha, naýqastar ońaltý kómegin turǵylyqty jerine qaramastan ala alady.
Bul Nur-Sultan, Almaty qalalarynan bólek Almaty, Aqtóbe, Atyraý, Batys Qazaqstan, Jambyl, Qaraǵandy, Qostanaı, Qyzylorda, Mańǵystaý men Túrkistan oblystarynan keletin patsıentter.
Klınıka basshysy aıtyp ótkendeı, júrgiziletin kardıologııalyq ońaltý aýyr kardıologııalyq syrqatqa (mıokard ınfargi, jiti koronarlyq sındrom, endovaskýlıarlyq aralasýlar, koronarlyq shýnttaý jáne júrek, onyń qaqpaqshalary men tamyrlaryna jasalǵan basqa hırýrgııalyq aralasýlar) shaldyqqan patsıentke kómek kórsetýge baǵyttalǵan is-sharalar kesheninen turady.
Kardıologııalyq ońaltýǵa emdik dene shynyqtyrý, mólsherlengen jaıaý júris, velotrenajerda jattyǵý, temeki shegýden bas tartý, lıpıdterdiń salmaǵy men deńgeıin qalpyna keltirý, sondaı-aq kardıovaskýlıarlyq patologııanyń qaýip faktorlaryn azaıtýǵa múmkindik beretin psıhologııalyq qoldaý kiredi.
«Kardıologııalyq ońaltýda densaýlyqty saqtaý, qalpyna keltirý, dene qımylynyń belsendiligi, eńbekke jaramdylyq, áleýmettik belsendilik; fızıkalyq belsendiliginiń keńeıýin eskere otyryp, júrek-qantamyr patologııasynyń asqynýy men órshýiniń aldyn alýǵa arnalǵan dári-dármektik terapııany ońtaılandyrý, aýrýdyń saldaryn joıý úshin naýqastyń psıhologııalyq jaǵdaıyn retteý sekildi aspektiler óte mańyzdy»,- deıdi Roza Tohtanaliqyzy.
Kardıologııalyq ońaltýdaǵy mańyzdy faktor ınstıtýtta qurylǵan Patsıent mektebine naýqstyń qatysýy. Densaýlyq mektepterinde tek qana bilim almaıdy, sonymen qatar adam ómirine qaýipti aýrýlardyń damýyna áser etetin qaýip faktorlarynan arylý ádisterine oqytady. Patsıentterde emdeý, turmysta jáne jumysta durys minez-qulyq kórsetý máselelerine oń kózqaras qalyptasady.
«Júrek aýrýyna shaldyqqan naýqastarǵa medıtsınalyq ońaltý múmkindiginshe erte bastalýy tıis. Ońaltý is-sharalary statsıonarlyq kezeń aıaqtalǵannan keıin tolyq kólemde iske asyrylady.
Densaýlyqty, jumysqa qabilettilikti jaqsartý, aýrýdyń asqynýynyń aldyn alý, patsıentterdi qoǵamnyń qalypty ómir súrý jaǵdaıyna biriktirý boıynsha jumystar óziniń áserin beredi»,- deıdi dáriger.
