Júrek aqaýymen týǵan balalardyń ómir súrý uzaqtyǵy artty — dáriger
ASTANA. KAZINFORM — Kardıohırýrgııa salasyndaǵy jetistikterdiń arqasynda júrek aqaýymen dúnıege kelgen balalardyń ómir súrý múmkindigi aıtarlyqtaı artty. Bul týraly UMC Klınıkalyq akademııalyq pedıatrııa departamentiniń dırektory, shtattan tys bas balalar kardıology Tatıana Ivanova-Razýmova aıtty.
Dárigerdiń sózinshe, buryn júrektiń týa bitti aqaýy bar balalardyń eresek jasqa jetýi sırek bolatyn.
— Buryn kardıohırýrgııa endi ǵana damyp jatqan kezde ota jasaý múmkindigi men tehnologııalar qazirgi deńgeıde bolǵan joq. Sondyqtan júrek aqaýymen týǵan balalardyń kóbi eresek jasqa jete almaıtyn, — dedi Tatıana Ivanova-Razýmova.
Onyń aıtýynsha, qazir jaǵdaı ózgergen.
— Qazir álemdik tájirıbede júrektiń týa bitti aqaýymen ómir súretin eresekterdiń sany balalardan kóp. Bul — kardıohırýrgııanyń damýynyń nátıjesi, — dedi maman.
Sonymen qatar ol Qazaqstanda júrektiń týa bitken aqaýymen ómir súretin eresekterdiń naqty sany ázirge belgisiz ekenin atap ótti.
Aıta keteıik, elimizde jyl saıyn 4 myńǵa jýyq bala júrek aqaýymen dúnıege keledi.
