Júregimiz aman bolsyn desek qandaı zııandy ádetterden aýlaq bolǵan jón
ALMATY. KAZINFORM – Búgingi kúni álemde júrek-qan tamyrlary aýrýlary adam óliminiń negizgi sebeptiń birine aınalǵan. Onyń kópshiligi biz túsine bermeıtin nemese mán bermeıtin jaman ádettermen baılanysty. Bul týraly Almaty qalalyq kardıologııalyq ortalyǵynyń kardıology Aqnur Arystanova aıtty. Ol sondaı-aq qandaı zııandy ádetterdiń júrekke qaýipti ekenin jáne olardan arylý joldaryn aıtyp berdi.
Dárigerdiń sózinshe, temeki shegý — júrekke áser etetin eń qaýipti ádettiń biri.
«Nıkotın jáne temekidegi basqa zattar ateroskleroz jáne mıokard ınfarktisi sııaqty júrek aýrýlarynyń damý qaýpin arttyrady. Sondyqtan temeki shegýden bas tartý — júregińizdi qorǵaýdyń eń jaqsy tásildiń biri. Odan keıin — durys tamaqtanbaý. Maılardy, qantty, tuzdy jáne óńdelgen taǵamdy shamadan tys tutyný semizdikke, qysymnyń joǵarylaýyna jáne júrekke qaýip tóndiretin basqa faktorlarǵa ákelýi múmkin. Júrek densaýlyǵyn saqtaý úshin jemis, kókónis, dándi daqyldar jáne maısyz aqýyzdardy kóbirek tutyný usynylady. Úshinshiden, qozǵalysy az ómir salty. Fızıkalyq belsendiliktiń bolmaýy júrek-qan tamyrlary aýrýlarynyń damý yqtımaldyǵyn arttyrady», — deıdi Aqnur Arystanova.
Alkogoldi shamadan tys tutyný da júrek densaýlyǵyna da keri áser etedi. Alkogoldi kóp mólsherde ishý qan qysymyn, holesterındi joǵarylatyp, arıtmııa men basqa da júrek problemalarynyń damý qaýpin arttyrýy múmkin.
Stress pen turaqty shıelenis júrekke teris áser etedi, bul qysymnyń joǵarylaýyna, júrek soǵý jıiliginiń joǵarylaýyna jáne basqa máselelerge ákeledi.
«Joǵaryda aıtylǵandardyń bárin eskere otyryp, júrektiń densaýlyǵyn saqtaý úshin jaman ádetten aýlaq bolý jáne salaýatty ómir saltyn ustaný qajet. Turaqty medıtsınalyq tekserý, durys tamaqtaný, fızıkalyq belsendilik jáne temeki shegýden bas tartý júrek-qan tamyrlary aýrýlarynyń qaýpin azaıtýǵa jáne kóp jyl boıy densaýlyqty saqtaýǵa kómektesedi», — dep atap ótti kardıolog dáriger Aqnur Arystanova.
Eske salsaq, buǵan deıin fastfýd ta — júrek aýrýynyń basty sebebi bolatynyn jazǵanbyz.
