Júregim aýyryp otyr - Demeý Jadyraevtyń bapkeri tóreshilikke narazylyǵyn bildirdi
ASTANA. INFORMSPORTS – Japonııada ótip jatqan HH jazǵy Azııa oıyndarynda grek-rım kúresinen synǵa túsken Demeý Jadyraevtyń beldesýi áleýmettik jelide qyzý talqylandy. Qazaqstandyq balýannyń jeke bapkeri Boranbek Qońyratov tóreshiler sheshimine qatysty pikir bildirdi
77 kelige deıingi salmaqta synǵa túsken Demeý Jadyraev japonııalyq balýanmen beldesti. Kezdesý barysynda qazaqstandyq sportshyǵa berilgen upaılarǵa qatysty jankúıerler arasynda túrli pikir aıtyldy.
Demeýdiń jeke bapkeri Boranbek Qońyratov Azııa oıyndaryna barmaǵanyn jáne shákirtiniń beldesýin syrttaı baqylaǵanyn jetkizdi.
«Men Japonııaǵa barǵan joqpyn. Mundaı jarystarǵa kvota bólinedi. Ulttyq quramanyń birinshi, ekinshi, úshinshi nómirli bapkerleri barady. Al men Demeýdiń jeke bapkeri bolǵandyqtan, bara almadym. Qazir júregim aýyryp, qatty qınalyp otyrmyn. Demeý babynda boldy, jaqsy kúresti. Tóreshilerdiń baǵalaýyna kóńilim tolmaıdy. Menińshe, Demeýde basymdyq bolǵan edi. Beldesýdiń janynda bolmaǵan soń, shákirtime nusqaý da bere almadym.Beldesýdi kózben kórip, janynda bolǵan adamdar óz tóreligin aıtar», – dedi Boranbek Qońyratov.
Aıta keteıik, grek-rım kúresinen jarystar aıaqtaldy. Qazaqstan quramasy bul básekede bir júldege qol jetkizdi. 67 kelige deıingi salmaqta Meıirjan Shermahanbet qola medal ıelendi.
