«Júreginiń oń jaqta ekenin 47 jyl boıy bilmepti» - respýblıkalyq basylymdarǵa sholý

15 aqpan kúni kesh­kisin EQYU-nyń Іs basyn­daǵy tóraǵasy, Qazaqstan Respýblıkasynyń Memleket­tik hatshysy - Syrtqy ister mınıstri Qanat Saýdabaev Baký qalasynan Armenııa Respýblıkasynyń astanasy - Erevanǵa saparmen keldi. Sapardyń basty maqsaty - kórshiles eki memleket - Armenııa men Ázirbaıjan arasyndaǵy Taýly Qarabaq problemasyn retteýge yqpal etý. Atalǵan taqyrypty arqaý etken maqala «Egemen Qazaqstan» basylymynyń búgingi sanynda «Túsinistikke ashyq únqatysý arqyly» degen taqyryppen berilipti. Aty aıtyp turǵandaı, maqalada Taýly Qarabaq problemasyn beıbit jolmen retteý máselesi kóterilipti. «Jıyrma jyldan astam ýaqyt­tan beri Taýly Qarabaq máselesi bedeldi halyqaralyq uıymdar qan­shama ret aralassa da áli kúnge she­shi­min tapqan joq. Sonyń saldary­nan irgeles jatqan Armenııa men Ázirbaıjannyń qatynastary kúrt úzilip, bir-birimen baılanys jasaý­dy múlde doǵardy. Kerrek deseńiz, olar temirjol men avtokólik qaty­nastaryn da jasamaıdy. Osynyń salqyny eki eldiń qarapaıym tur­ǵyndaryna, sondaı-aq eki memlekettiń ekonomıkalyq damýyna tıip otyrǵan jaıy bar»,- deıdi basylym.

Sondaı-aq «Egemen Qazaqstan» gazetiniń búgingi sanynda Memlekettik syılyqtyń laýreaty Ánes Saraıdyń «Noǵaılynyń rýhanı ómiri» atty maqalasynyń jalǵasy jaryq kóripti.

«Bal tatyǵan barqyt qymyz». Osy taqyryppen berilgen «Egemen Qazaqstan» gazetindegi kelesi maqala kóshpendi qazaqtyń kóne asyn ózgeler ıemdenip ketpesin degen oıdy ortaǵa salady. «Bizdiń aıtpaǵymyz, qazir Batys Eýropada qymyz ishý ádetke aınala bastasa, Berlın men mıýn­hen­dikter de sońǵy kezde qy­myz­­dyń emdik qasıetine den qoıa bas­taǵan. Biraq olar qymyz degen atyn ózgertip, bıe sútinen jasalǵan ıogýrt dep ataıtyn kóri­nedi. Sózdiń toq eteri, halqy­myzdyń súıikti ulttyq asyn arnaıy baǵdar­lama aıasynda patenttep almasaq, ony ózgelerdiń ıemdenip ketýi ábden múm­kin. San soǵyp qalmaıyq, aǵaıyn!»,- deıdi basylym.

***

«Qazaqstanda kedeı balalardyń úles salmaǵy qandaı?», «Qazaqstanda eń kedeı balalar qaıda turady?», «Jahandyq daǵdarys balalarǵa qalaı áser etti?» - ıÝNISEF uıymy elimizde arnaıy zertteýler júrgizip, Statıstıka jónindegi agenttiktiń resmı derekterine úńile otyryp, osyndaı qyzyqty ári kókeıtesti saýaldarǵa jaýap taýypty. Jahandyq uıymnyń zertteýleriniń qorytyndysyn «Aıqyn» basylymynyń búgingi sanyndaǵy «Qazaq balalary sheteldik zertteýshilerdi qaısarlyǵymen tańǵaldyrdy» degen taqyryppen berilgen maqaladan oqı alasyzdar.

«Zamanyń túlki bolsa, tazy bop shal» demekshi, bir kúnde mıllıoner atanýdy jyldar boıy armandaǵan Pavlodar oblysyndaǵy «Alıans banktiń» Baıanaýyldaǵy fılıalynyń eki qyzmetkeri tal túste 12 mıllıon teńgeni «tazy» bop shalýǵa tyrysypty. Egjeı-tegjeıin «Aıqyn» gazetiniń búgingi sanyndaǵy «Bankırdiń ózi baýkespe bolyp shyqty» dagen maqaladan oqyńyzdar.

«Mınıstrdiń munysy nesi?» osy taqyryppen jaryq kórgen «Aıqyn» gazetindegi kelesi maqala «aıýǵa namaz úıretken «taıaqty» adamǵa qoldanýǵa bola ma? Degen ýájdi alǵa tartady. «Densaýlyq saqtaý mınıstrligi 2011-2015 jyldarǵa arnalǵan memlekettik Densaýlyq saqtaý baǵdarlamasynyń jobasyn ázirlep, mınıstr Dosqalıev bul jobany tanystyrýdy soltústik óńirden bastady. Petropavl qalasyndaǵy sý jańa Qan ortalyǵynyń ashylý rásimine barǵan bas dáriger jańa jobanyń negizgi tustaryn súıinshileı ótkenmen, dárigerler qaýymynyń bul jańalyqty asqan qýanyshpen qarsy alǵany baıqalmaǵan syndy»,-deıdi basylym.

***

Kóńilińiz alaburtyp muńaıǵan shaqta, ózińizge ózińiz syımaı qýanǵan shaqta, alda jalda shoshynyp qoryqqan sátte júregińiz qaı tustan dúrsildeıdi? Sol jaǵyńyzdan shyǵar. Al Ońtústik Qazaqstan oblysynyń turǵyny Sarybaı Bakenjeevtiń judyryqtaı júregi oń jaǵynan soǵady. Ol óziniń boıyndaǵy bul erekshe qubylysty jasy 50-ge taıaǵan shaqta biraq baıqapty... Júregi «adasqan» jan týraly «Alash aınasy» gazetiniń búgingi sanyndaǵy «Júreginiń oń jaqta ekenin 47 jyl boıy bilmepti» degen maqaladan oqı alasyzdar.

«MADE in KAZAKHSTAN-dy qashan kıemiz?» degen saýalǵa qurylǵan «Alash aınasy» basylymyndaǵy kelesi maqala otandyq ónim máselesin qozǵapty. «90-jyldarǵa deıin elimizdegi 11 aıaqkıim fabrıkasy jylyna 50 mıllıon dana ónim shyǵaryp, siz ben bizdiń jalańaıaq qalmaýymyzdy qamdastyrǵan-tyn. Halyqty sapaly aıaqkıimmen qamtamasyz etken fabrıkanyń búginde beseýi-aq qalǵan. Altaýy óz arbasyn órge súıreýge shamasy jetpeı, metallolomǵa aınalyp tyndy. Oǵan naryq degen qyspaqtyń da az úles qospaǵany belgili. Kezinde kópshilikke arnap tózimdi de talapqa saı keletin aıaqkıim shyǵaryp kelgen fabrıkalardyń búginde memlekettik tapsyrysqa kúni túsip otyr. Olardyń erkin saýdaǵa ónim shyǵarýǵa júrekteri daýalamaıdy»,- deıdi basylym.

«Shańǵyshylar sátsizdigine qar kináli me?». "Alash aınasy" gazetiniń Vankýverde júrgen tilshisi Nurǵazy Sasaev olımpıadalyq oıyndardan arnaıy reportaj jasaıdy. Qazaqstandyq sportshylar qandaı oıyn kórsetip jatyr, olardyń baby men sátsizdikterine ne sebep bolyp jatyr? Tolyǵyryq gezettiń búgingi nómirine nazar aýdaryńyz.