Júregin aýystyrǵan shymkenttiktiń jaǵdaıy qalypty
Basqarma basshysy naýqastyń qazirgi densaýlyq jaǵdaıyn surap, tezirek jazylyp, otbasyna oralýyna tileýles ekenin jetkizdi. Sondaı-aq, qalanyń bas dárigeri patsıentke jasalǵan transplantatsııalyq otanyń qala medıtsınasyn damýyndaǵy zor jetistik ekenin atap ótti.
Bizdiń jergilikti kardıohırýrgter Ulttyq ǵylymı kardıohırýrgııalyq ortalyǵy mamandarymen birlesip, otany sátti jasap shyqty. Osy oraıda, otany jasaǵan bilikti dárigerlerge alǵysymdy bildiremin. Qala turǵyndarynyń saýlyǵyn jaqsartyp, sapaly medıtsınalyq kómek kórsetý úshin barynsha qyzmet etemiz
, - dedi basqarma basshysy Nurlybek Asylbekov.
Aıta keteıik, 5 shilde kúni Shymkent júrek ortalyǵynda 61 jastaǵy turǵynǵa júrek transplantatsııasy jasaldy. Ota kezinde kardıohırýrgter patsıentke 46 jastaǵy er adamnyń júregin ornatyp berdi. Donorlyq júrekti qaıtys bolǵan er kisiniń týǵan-týystary paıdalanýǵa ruqsat bergen. Kúrdeli operatsııadan keıin toǵyzynshy kúni dárigerler naýqastyń júrek tamyryna stend ornatyp berdi. Búginde patsıenttiń jaǵdaıy jaqsy. Júregin almastyrǵan naýqas medıtsına mamandarynyń baqylaýynda bolady.