Júregim Qazaqstan dep soǵady - Germanııa turǵyndarynyń arnaıy quttyqtaýy
ASTANA. QazAqparat - Ulan-baıtaq uly dalany mekendegen qazaq halqyn qarapaıym etnıkalyq nemis otbasy Jańa jyl merekesimen arnaıy quttyqtady, dep jazady Habar 24 .
Berlın qalasy mańyndaǵy shaǵyn aýdanda turatyn jetpis jeti jastaǵy ıAkov Nýs - qazaq tilin jetik biletin nemis aqsaqaly.
ıAkov Nýs aqsaqaldy Germanııadaǵy jergilikti qazaqtar ekinshi Gerold Belger dep ataıdy. Jambyl óńiriniń Aqkól aýylynda qazaqtyń qalyń ortasynda ósken nemis azamaty qazaqtyń tilin jetik biledi. Soǵystyń aýyr jyldaryn, ashtyqtyń zardabyn óz kózimen kórgen qarııa kezinde saqpanda qoı baǵyp, ógizge jegilgen soqamen talaı jer jyrtqany da bar eken. Qazir ol óziniń tarıhı otanynda turady, «alaıda júregim Qazaqstan dep soǵady», - deıdi ol.
«Esh ýaqytta, eshqandaı jaman sóz estigen emespin. Sodan beri qazaq eline bir gramm da ókpem joq. Men ózimdi aıtyp otyrmyn, eger de qazaq bolmaǵanda, soǵys jyldarynda ashtan ólip qalatyn edi. Áıtpese ol ýaqytta qazaqtardyń ózderi óte kedeı bolǵan. Biraq bir japyraq nan bolsa da, ony jartylaı bólip beretin», - deıdi Berlın qalasynyń turǵyny ıAkov Nýs.
Aqsaqaldyń jary Lıýbov apaı da qazaqtardy, Qazaqstandy qatty saǵynyp júr eken. Óz úıine kelip turǵan qazaqtyń qyzyn kóre sala kóz jasyna erik berip, júregi bosap ketti. Lıýba apaı da sanaly ǵumyrynyń 40 jylyn Qazaqstanda, Sokolov-Sarybaı taý-ken baıytý kombınatynda qyzmet atqaryp ótkizgen.
Germanııaǵa kóship ketken qarııalar kún saıyn elden habar alyp turatyn kórinedi. Qazaqstannyń memleket retinde qol jetkizgen ár jetistigi nemis áýletin shyn qýantady.
«Qazaq halqynyń jetken jetistikteri jaıly jańalyq jyraqta júrsek te bizdi qatty qýantady. Álemge áıgili Astana qalasyna qarap da qýanamyz. Qazaq halqyna jáne onyń basshysyna beıbit ómir tileımiz, álemde eshqashan soǵys bolmasyn. Men biletin qazaq ulty - dostyqty súıetin óte meıirban halyq», - deıdi Lıýbov Nýs.
ıAkov ataı ár eki jylda bir ret Qazaqstanǵa ushyp baryp, saǵynyshyn basyp turady eken. «Alaıda sońǵy kezde densaýlyǵym syr berip, týǵan aýylyma jete almaı, kóńilim qulazyp júr» degendi aıtady ol. Kópti kórgen qarııa óskeleń nemis urpaǵyna arnap, qazaq halqy jaıly kitap jazyp jatqanyn aıtady. Óz eńbeginde ol qazaqtaı halyqtyń daladaı darhan kóńili men meıirimdi adamdary jaıly aıtyp bermek.
