Júregi táýligine 53 ret toqtaǵan elordalyq naýqas aman qaldy

ASTANA. QazAqparat - Elordadaǵy №2 qalalyq kópsalaly aýrýhananyń dárigerleri naýqastyń ómiri úshin 35 kún boıy kúresken. Bir táýlik ishinde onyń júregi 53 márte toqtap, qaıta soǵa bastaǵan, dep habarlaıdy QazAqparat.

Naýqas 6 qańtar kúni mıokard ınfarktisi boıynsha jedel járdem kóligimen óte aýyr jaǵdaıda kópbeıindi aýrýhanaǵa shuǵyl túrde jetkizildi. Túsken sátten keıin 10 mınýt ishinde oǵan ota (karonarografııa jáne stentteý) jasaldy.

Qan aınalymy únemi toqtap turdy. Dárigerler kúni-túni naýqastyń júregin qalpyna keltirýmen aınalysty. Júrek qaǵysy bir kúnde 53 ret toqtady. Jasandy júrek pen ókpe qyzmetin atqaratyn EKMO (ekstrakorporaldy membranalyq ottegimen qanyqtyrý) qosýǵa týra keldi.

Dárigerler 35 kún boıy patsıenttiń janynan ketpedi, turaqty baqylaý júrgizildi. Osy ýaqyt ishinde qan ketý boldy, sodan keıin qabyný reaktsııasy, sepsıs jáne júıelik kóp múshelik jetkiliksizdik paıda boldy.

«Naýqasty o dúnıeden birneshe ret qaıtaryp alý, ony aıaqqa turǵyzyp qana qoımaı, deneniń barlyq qyzmetin saqtaý múmkin boldy. Mundaı operatsııalardy tipti birneshe ret jasaǵan tájirıbeli reanımatologtar «medıtsınalyq ǵajaıyp» dep ataıdy», - dedi kardıobıt bóliminiń meńgerýshisi Rasýl Saǵynaev.

«Naýqas aman qaldy, qýanyshymyzǵa oraı, mıyna zııan kelgen joq. Ol úshin qabyldaý bólmesi dárigerleriniń, ınterventsııalyq kardıologtardyń, kardıohırýrgtardyń, kardıo BIT kezekshi dárigerleriniń (Rýslan Qalıev, Qasqyr Naýryz, Lýnara Qadyrova, Rıshat Aıtqalı), medbıkeler men sanıtarlardyń úlken komandalyq jumysy jasaldy. Biz úshin bul úlken jeńis», - dep atap ótti aǵa kardıoordınator Sábıt Aınamqulov.

Qazirgi ýaqytta naýqas turaqty jáne ınterventsııalyq kardıologııa bólimine aýystyryldy.

Foto: Astana qalasy ákimdiginiń baspasóz qyzmeti