Júregi ońǵa qaraı jyljyǵan: Aqtaýda týabitken patologııasy bar eki nárestege kúrdeli ota jasaldy
Mańǵystaý oblysy densaýlyq saqtaý basqarmasynyń málimetinshe , oblystyq kópbeıindi balalar aýrýhanasynyń hırýrgteri týa bitken patologııasy bar eki nárestege kúrdeli ota jasaǵan. Sábılerdiń otadan keıingi kezeńi aýyr bolǵanyna qaramastan, qazir olardyń densaýlyǵyna alańdaýǵa negiz joq.
Balalar aýrýhanasy hırýrgııa bólimshesiniń meńgerýshisi Sultanbek Tumashevtyń aıtýynsha, alǵashynda jansaqtaý bólimine túsken eki náresteniń keshendi em alýy úshin barlyq jaǵdaı jasalǵan.
Ómirge kelgennen keıin jeti kúnnen soń 4 aılyq sábıde dárigerler ishten týǵan jaryq kóketi paıda bolǵanyn anyqtaǵan. Bul óz kezeginde tynys jetkiliksizdigine ákelip soqqan, sonyń saldarynan jaǵdaıy kúrt nasharlaǵan.
«Shyn mánisinde bul óte aýyr patologııa jáne mundaı jaǵdaıda kóbine otany keıinge qaldyrýǵa týra kelip jatady, ıaǵnı jańa týǵan bala eń bolmaǵanda úsh jasqa tolýy tıis. Bul dıagnozben balanyń jaǵdaıy kún ótken saıyn nasharlap, kútpegen jerden, ásirese túngi ýaqytta qaıǵyly oqıǵa oryn alýy ǵajap emes. Operatsııany bastamas buryn oılana kele toraskopııaǵa júgingendi jón sanadyq, sebebi bul - ota jasaýdyń eń tıimdi joly. Barlyǵy oıdaǵydaı ótken soń kishkentaı sábı bizdiń aýrýhanada 30 kúnnen astam ýaqyt jatty, jaǵdaıy jaqsarǵan soń úıine jiberdik», - deıdi Sultanbek Tumashev.
Ekinshi náreste Mańǵystaý aýdany Shetpe aýylynan sanıtarlyq avıatsııa kómegimen oblystyq balalar aýrýhanasyna jetkizilgen bolatyn.
«Búldirshinde kókek kemistigi bar ekendigin anyqtadyq. Juqa jáne qalyń ishek ókpege ótip ketken, al júregi bolsa oń jaq betke jyljyǵan. Ota kezinde ishekti tolyǵymen tómen túsirdik. Týa bitken ishek patologııasyna baılanysty araǵa úsh kún salyp sábıge qaıta ota jasaýǵa týra keldi. Anasynyń aıtýynsha, ol júkti kezinde úsh ret ýltradybystyq zertteý jasaǵan, soǵan qaramastan mamandar patologııany anyqtaı almaǵan. Ota sátti ótken soń búldirshin aýrýhanada 20 kún jatyp, emin jalǵastyrdy, qazir onyń densaýlyǵyna alańdamaýǵa bolady», - deıdi Sultanbek Tumashev.
Dárigerlerdiń aıtýynsha, búgingi tańda kishkentaı naýqastardyń jaǵdaıy jaqsy, qosymsha ota jasaý qajettigi joq. Balalar qulan-taza aıyǵyp, úıine oralǵan.