Júregi aýystyrylǵan qazaqstandyq transplant-oıyndarynyń júldegeri atandy
ASTANA. QazAqparat - Qazaqstandyq Jánibek Ospanov Polshada ótip jatqan dene múshesi aýystyrylǵan adamdar arasyndaǵy jarysta sýda júzýden kúmis jáne ústel tennısinen qola enshiledi, dep habarlaıdy «QazAqparat» HAA tilshisi.
Bul transplantatsııany bastan ótkergen qazaqstandyq úshin birinshi jeńis boldy. Týrnır Polshanyń Zamosts (Zamość) qalasynda 2017 jyldyń 24-27 mamyry aralyǵynda ótti.
«Jarys jeńil atletıka, sýda júzý, ústel tennısi, dartsý boıynsha ótti. Men ústel tennısi, sýda júzý, dartsý boıynsha qatystym. Nátıjesinde 50 metrge júzýden kúmis júlde jáne ústel tennısinen úshinshi oryndy ıelendim», - dedi ol.
Aıta keteıik, bıyl Ispanııada Búkilálemdik sporttyq transplant-oıyndary ótedi, oǵan Qazaqstannyń atynan 6 sportshy qatysady.
