Júregi aýystyrylǵan qazaqstandyq Ispanııadaǵy Dúnıejúzilik Oıyndardyń jeńimpazy atandy
ASTANA. QazAqparat - Astanalyq Gúlmıra Smaıylova Ispanııada ótken 21-shi jazǵy Dúnıejúzilik Transplant-oıyndarynda birinshi oryn ıelendi, dep habarlady «QazAqparat» HAA tilshisi.
«Júregi aýystyrylǵan qazaqstandyq Gúlmıra Smaıylova Qazaqstan quramasynyń qanjyǵasyna birinshi altyn medaldy saldy. Ol áıelder arasynda ótken boýlıng jarysyna qatysty. Vengrııa sportshysy kúmis, Anglııa ókili qola ıelendi», - dedi komanda kapıtany Jánibek Ospanov.
Áıelder arasyndaǵy boýlıng boıynsha Qazaqstan quramasy Japonııa, Italııa, Gonkong, Avstralııa komandalarymen birge altyn medalmen úshinshi orynda, Kanada 3 altyn, 1 kúmispen kósh bastap tur, ekinshi orynda eki altyn, bir kúmis medalmen Taıland quramasy.
Eske salsaq, Qazaqstan donor organmen adamdar arasynda ótken «Olımpıadaǵa» alǵash ret qatysýda. 21-shi Dúnıejúzilik Transplant-oıyndaryna 6 qazaqstandyq sportshy qatysýda: Jánibek Ospanov, Gúlmıra Smaıylova, Ashat Qalıkeshov, Erjan Muhamadıev, Jetkinshek Nurov, Ápreshan Qobdahan. Úsh qatysýshy - júregi aýystyrylǵan, úsheýi - búırekteri aýystyrylǵandar. Olar júzý, ústel tennısi, boýlıng jarystaryna qatysady.
