Júregi aýyratyn adamdarǵa koronavırýstyń «omıkron» shtamy qanshalyqty qaýipti

ALMATY. QazAqparat - Kardıologııa jáne ishki aýrýlar ǵylymı-zertteý ınstıtýty Konsýltatsııalyq-dıagnostıkalyq ortalyǵynyń joǵary sanatty kardıolog dárigeri, medıtsına ǵylymdarynyń kandıdaty Botagóz Qystaýova QazAqparat tilshisine KVI ınfektsııasy júregi aýyratyn adamdarǵa qanshalyqty qaýipti ekenin aıtyp berdi.

- Jańa «omıkron» shtamy adamnyń júrek jáne júrek-qantamyr júıesine áser etedi me?

- Infektsııadan týyndaǵan jiti qabynýdyń reaktsııasy júrek qyzmetin nasharlatyp, júrek qyzmetiniń kemistigi bar patsıentterde sımptomdardy órshitýi múmkin. Aýyr qabyný protsesteri arıtmııany asqyndyryp, keıbir patsıentterde júrekshe fıbrıllıatsııasy týyndaýy múmkin.

Vırýstyń qabynatyn áserin eskere otyryp, vırýstyq ınfektsııa koronarlyq arterııalarda aterosklerotıkalyq túıindaqtardyń (maı shógindileri) úzilýin týdyryp, ol jiti koronarlyq sındromǵa (júrek ustamasyna) ákeledi degen qaýip bar. Keýdesinde jiti jaısyzdyqty sezinetin adamdar koronavırýs sımptomdary paıda bolǵan kezde mindetti túrde dárigerge qaralýy tıis.

- Júrek-qantamyr júıesi aýrýlaryna shaldyqqan adamdar «omıkron» shtamyn juqtyryp alsa neni bilgenderi jón?

- Eger adamdar júrek-qantamyr aýrýlarynyń sımptomdaryn koronavırýs ınfektsııasy kórinisinde sezinetin bolsa, olardy nazardan tys qaldyrmaýy tıis.

Eger deneshynyqtyrý jattyǵýlary kezinde nemese tynyshtyqta keýdeńiz aýyryp, tynys alý qıyndasa, júrek qaǵysy jıilep nemese esten tanatyndaı álsizdikti sezinseńiz, sizge mindetti túrde jedel járdem qyzmetin shaqyrý qajet. Mamandar emdeýge jatqyzý týraly sheshim qabyldamas buryn aıtylǵan sımptomdar men jalpy qarap-tekserýdiń negizinde sizdiń jaı-kúıińizdi baǵalaıdy.

- Ókpeni jasandy jeldetý apparaty júregi aýratyn adamdar úshin qaýipti me?

- Dárigerler ókpeni jasandy jeldetý apparatyna qosý týraly sheshimge adamdy qutqarýdyń basqa joldary bolmaǵan kezde ǵana júginedi. Patsıentterdi ókpeni jasandy jeldetý apparatyna qosýǵa beriletin kórsetkishter medıtsına qyzmetkerlerine arnalǵan usynymdarda jazylǵan. Jasandy jeldetkish ókpeniń jetkilikti túrde demala almaı jáne olarda jınalyp qalǵan kómirqyshqyl gazyn shyǵara almaǵan jaǵdaıda qajet. Bul jaǵdaıda ókpeni jasandy jeldetý apparaty tynys alý júıesiniń qyzmetin atqarady. Eger tynys ala almaǵan adamdy ókpeni jasandy jeldetý apparatyna qospasa, onyń ishki aǵzalary ottegimen qamtamasyz etilmeı qalady. Osydan keıin keshikpeı júrek óz soǵysyn toqtatady, qanmen qamtamasyz etilmeıdi, birneshe mınýttyń ishinde patsıent qaıtys bolyp ketýi múmkin. Sondyqtan, eger ókpeni jasandy jeldetý apparatyna qosý qajettigi týyndaıtyn bolsa, onda júrek aýrýlary bar nemese ol aýrýlary joq adamdar úshin ókpeni jasandy jeldetý apparatynyń qaýiptiligi týraly másele talqylanbaıdy.

- «Omıkron» shtamyn juqtyrǵan júrek-qantamyr aýrýlary bar naýqastarǵa qandaı keńes beresiz?

- Júrek-qantamyr aýrýlarynyń bolýy kórinisinde «omıkron» shtamyn ǵana emes, basqa shtamdardy juqtyrý da asqynýlardyń damýyna ákelýi múmkin. Ol mıokard jáne tamyrlardyń sozylmaly aýrýlarynyń dekompensatsııasy nemese olardyń vırýstyq zaqymdanýy. Negizgi aýrýdyń dekompensatsııalanǵan aǵymy trombozdar, jiti júrek-ókpe jáne polıorgandyq jetispeýshiliktiń bolý qaýpin arttyrady. Bul rette:

- juqtyrýdy boldyrmas úshin usynylatyn profılaktıkalyq sharalardy muqııat oryndaý qajet;

- júrek jáne qantamyr aýrýlary kezinde taǵaıyndalǵan dári-dármekpen emdelýdi toqtatpańyz. Bul densaýlyqtyń nasharlaýyna ákelýi múmkin;

- aldyn ala josparlanǵan operatsııalardan bas tartýǵa bolmaıdy. Júrek nemese qantamyrlarynyń keıbir aýrýlary keshiktirgen jaǵdaıda jyldam órship, ólim jaǵdaıyna ákelýi múmkin. Operatsııany jasaý nemese ony kúte turý týraly sheshimdi kardıolog qabyldaıdy.

- Suhbatyńyzǵa rahmet!