Jumysynan aıyrylǵan 100 myń adam áleýmettik saqtandyrý qorynan tólem aldy

NUR-SULTAN. QazAqparat - 1 jeltoqsandaǵy jaǵdaı boıynsha Memlekettik áleýmettik saqtandyrý qorynan jumysynan aıyrylýyna baılanysty 100,1 myń adam áleýmettik tólem aldy. Bul rette bıyl 73,3 myń adamǵa tólem alǵash ret taǵaıyndaldy, dep habarlaıdy QazAqparat Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Vedomstvonyń málimetinshe, qoldanystaǵy zańnamaǵa sáıkes jumystan bosatylǵan jumyskerler mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólem alady.

Tólem joǵalǵan kiristiń 40%-yna deıingi mólsherde MÁSQ qarajaty esebinen júzege asyrylady.

«Tólem taǵaıyndaý úshin jumystan bosatylǵan jumyskerge:

- eGov.kz portalynda avtorızatsııalaný;

- «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;

- onlaın qyzmetke tapsyrys berip, barlyq joldardy toltyrý jáne oǵan ETsQ-men qol qoıyp, ótinimdi jiberý qajet;

- bir kún ishinde turǵylyqty jerińizdegi halyqty jumyspen qamtý ortalyǵy (budan ári – HJQO) bos jumys oryndaryn usynady;

- eger jumys tabylmasa, 3 jumys kúni ishinde qashyqtan jumyssyz mártebesi beriledi (qajet bolǵan jaǵdaıda sizge HJQO qyzmetkeri qosymsha aqparat jınaý úshin habarlasady)», delingen habarlamada.

Bul qyzmetti onlaın rejıminde Elektrondyq eńbek bırjasy arqyly da alýǵa bolady.

«Jumyssyz retinde tirkelý týraly málimetter bolǵan kezde mınıstrliktiń aqparattyq júıesi proaktıvti formatta MÁSQ-tan tólemdi taǵaıyndaý boıynsha qyzmet kórsetýge kelisý úshin mobıldi telefonǵa SMS habarlama jiberedi. Kelisken jaǵdaıda SMS habarlamaǵa jaýap berý qajet. Tólem avtomatty túrde taǵaıyndalady», delingen habarlamada.

Esterińizge sala keteıik, MÁSQ qarajaty esebinen jumystan aıyrylǵan jaǵdaıda tólenetin áleýmettik tólem jumystan shyǵý sebepterine qaramastan júzege asyrylady jáne jumyssyz adamdy ol jumys izdegen kezeńde qoldaýǵa arnalǵan.

Budan buryn habarlanǵandaı, QR Eńbek jáne halyqty áleýmettik qorǵaý mınıstrligi Elektrondyq eńbek bırjasy arqyly halyqty jumyspen qamtý ortalyqtarynyń qashyqttan qyzmet kórsetý fýnktsısyn iske qosty.

Bul jumyssyzdardy tirkeý jáne azamattardyń jumyspen qamtýdy qoldaý boıynsha memlekettik qyzmetterdi, onyń ishinde jumysynan aıyrylǵandardyń áleýmettik tólem alý rásimderin jeńildetýge múmkindik berdi. Endi barlyǵyn tek ınternet, kompıýter jáne elektrondyq tsıfrlyq qoltańba arqyly ǵana jasaýǵa bolady.