Jumysyna ketken: Atyraýda er adam 5 kúnnen beri izdestirilýde
ATYRAÝ. QazAqparat – Atyraýda 54 jastaǵy er adam jumysyna shyǵyp ketip, qaıta oralmaǵan, dep habarlaıdy QazAqparat.
Oblystyq Tótenshe jaǵdaılar departamenti baspasóz qyzmetiniń aqparatyna qaraǵanda, «WDC» JShS-de kúzetshi bolyp jumys istegen T. Orazalıev 6 naýryzda úıinen shyǵyp ketip, qaıta oralmaǵan.
«Departamenttiń dıspetcherlik pýltine 10 naýryzda Atyraý qalasynyń turǵynynan 1967 jyly týǵan T.Orazalıevtiń 6 naýryzda saǵat 19.00-de úıden jumysqa shyǵyp, osy ýaqytqa deıin qaıta oralmaǵany týraly habar tústi. Joǵalǵan azamatty izdestirýge 10 naýryzda jedel qutqarý jasaǵynyń 7 qyzmetkeri, 4 kınologııalyq esep pen 4 tehnıka jumyldyryldy. Sondaı-aq, eriktilermen (4 adam men 2 tehnıka) birlesip Birlik, Aqsaı, Juldyz-3 eldi mekenderinde izdestirý bastaldy», - dep habarlady departamenttiń baspasóz qyzmetinen.
Іzdestirý jumystary búgin, 11 naýryzda saǵat 08:00-de qaıta bastalyp, oǵan jedel qutqarý jasaǵynyń 10 qyzmetkeri, 3 tehnıkasy (onyń ishinde 2 kınologııalyq esep) men joǵalyp ketken azamattyń 10 týysy tartylǵan.
Eske sala ketelik, buǵan deıin Atyraýda polıtsııa men qutqarýshylar 30 jastaǵy jigitti izdeýge jumyldyrylǵan edi.
