Jumysyn toqtatýǵa májbúr mekemeler jalaqyny qalaı tóleıdi

NUR-SULTAN. QazAqparat – Tótenshe jaǵdaıǵa baılanysty óz jumysyn toqtatýǵa májbúr bolǵan mekemeler eń tómengi jalaqydan kem bolmaıtyn eńbekaqy tóleýi tıis, dep habarlaıdy QazAqparat tilshisi.

Bul týraly QR Eńbek jáne halyqty áleýmettik qorǵaý mınıstri Birjan Nurymbetov Ortalyq kommýnıkatsııalar qyzmetindegi brıfıngte aıtty.

«Tótenshe jaǵdaıǵa baılanysty óz jumysyn toqtatýǵa májbúr bolǵan mekemelerge Eńbek Kodeksiniń 112-baby taraıtyn bolady. Bul – májbúrli jumys toqtatý dep atalady. Bul jerde jumys berýshi tarapynan jumysshylarǵa keminde elimizde bekitilgen eń tómengi jalaqydan kem emes kólemde eńbekaqy tólenýi tıis», - dedi mınıstr Ortalyq kommýnıkatsııalar qyzmetinde ótken brıfıngte.

Onyń aıtýynsha, bizdiń elimizdegi eń tómengi jalaqy mólsheri – 42500 teńge.

«Biraq, eger de, Eńbek shartynda nemese Ujymdyq shartta osyndaı májbúrli toqtatý jaǵdaıyna tómengi jalaqydan joǵary jalaqy qarastyrylǵan bolsa, onda joǵary jalaqy tólenedi. Bul shekti soma eń tómengi jalaqy mólsherinen kem bolmaýy tıis», - dedi B. Nurymbetov.

Buǵan deıin mınıstr qashyqtyqtan jumys isteý múmkindigi bar barlyq kásiporyndar men mekemeler osy rejımge aýysýǵa mindetti ekenin málimdegen edi.

Sondaı-aq, jumys kólemi shekteletin bolsa, jumys berýshiler ózderiniń buıryǵymen qysqartylǵan jumys rejımine kóshýge quqyly.

Eske sala ketsek, QR Prezıdentiniń Jarlyǵymen Dúnıejúzilik densaýlyq saqtaý uıymynyń jańa COVID-19 koronavırýsyn pandemııa dep jarııalaýyna baılanysty QR barlyq aýmaǵynda 2020 jylǵy 16 naýryz 08 saǵat 00 mınýt pen 2020 jylǵy 15 sáýir 07 saǵat 00 mınýt aralyǵynda tótenshe jaǵdaı engizildi.

Sondaı-aq, Qazaqstan azamattaryna 15 sáýirge deıin el aýmaǵynan shyǵýǵa tyıym salyndy.

QR Prezıdenti Qasym-Jomart Toqaev el halqyna úndeý joldady. Joldaýdyń tolyq mátini arnaıy jarııalandy.