Jumystan shyǵyp qalǵan azamattar 6 aılyq áleýmettik tólemdi qalaı alady

NUR-SULTAN. QazAqparat – Eńbek jáne halyqty áleýmettik qorǵaý mınıstri Birjan Nurymbetov tótenshe jaǵdaı rejimine qaramastan jumystan shyǵyp qalǵan azamattar 6 aılyq áleýmettik tólemdi qalaı alatynyn aıtyp berdi, dep habarlaıdy QazAqparat tilshisi.

«Tótenshe jaǵdaıǵa qaramastan jumystan shyǵyp qalǵan azamattar, jaldamaly jumysshylar Memlekettik saqtandyrý qorynan 6 aıǵa deıin ózderiniń jalaqysynyń 40 paıyzyna teń aqy alatyn bolady. Ol úshin de egov.kz portalynyń «jumyspen qamtý» aıdaryndaǵy «jumys izdeýshi» degen bólimine tirkelesiz. Úsh kúnnen keıin sizdi mindetti túrde jumyssyz retinde tirkeıdi. Osydan keıin avtomatty túrde jumysyn joǵaltqan adam retinde 6 aıǵa tólenetin tólem sizge taǵaıyndalady», - dedi Birjan Nurymbetov OKQ-da ótken baspasóz máslıhatynda.

Mınıstrdiń aıtýynsha naýryz aıynyń ózinde elimizdegi 12 729 adamǵa jumys tabylǵan. Onyń ishinde karantın jarııalanǵan qalalarda 2 331 adam jumyspen qamtý ortalyǵy arqyly elektrondy túrde habarlasyp, jumys tapqan.

Eske sala ketsek buǵan deıin Birjan Nurymbetov elimizde 42 500 teńgelik tólemdi alýǵa bolatyn arnaıy saıttyń ashylatynyn málimdegen edi.