Jumystan shyǵarylǵan munaıshylar respýblıkanyń taý-ken jáne munaıgaz salalaryna burynǵy jalaqylarynyń 80-90 paıyzy shegindegi aılyqpen jumysqa ornalastyrylady - Ó.Shókeev
ASTANA. 20 jeltoqsan. QazAqparat /Marlan Jıembaı/ - Jumystan shyǵarylǵan munaıshylar respýblıkanyń taý-ken jáne munaıgaz salalaryna burynǵy jalaqylarynyń 80-90 paıyzy shegindegi aılyqpen jumysqa ornalastyrylady.
Bul týraly búgin Úkimet otyrysynda Aqtaýdan tikeleı beıne baılanysqa shyqqan QR Premer-Mınıstriniń birinshi orynbasary Ómirzaq Shókeev málim etti.
«Buǵan deıin jumystan shyǵarylǵan «Ózenmunaıgaz» ben «Qarajambasmunaıgaz» kompanııalarynyń 1800-ge jýyq jumysshysyn eńbekpen qamtamasyz etý máselesi óte ózekti ekendigin basa aıtqan ol: «Bul problemamen qazirdiń ózinde aınalysýdy qolǵa aldyq. Boljamdy kelesi is-áreket jospary mynadaı: jumystan bosatylǵan jumysshylarǵa respýblıkanyń iri kásiporyndarynan, atap aıtqanda, taý-ken jáne munaıgaz salalaryna basymdyq berile otyryp, olardyń burynǵy jalaqylarynyń 80-90 paıyzy shegindegi aılyqpen jumys usynylady», - dedi ol.
Ó.Shókeevtiń atap ótýinshe, olar kelisken jaǵdaıda kóshý, ornalasý jáne qajetti baspanamen qamtamasyz etýmen baılanysty shyǵyndaryn óteý máselesi de qarastyrylýda. Bul oraıda «Jumyspen qamtý - 2020» memlekettik baǵdarlamasynyń tetikteri kádege asýy múmkin. «Jumyspen qamtý baǵdarlamasynyń eńbek resýrstaryn kóshirý bóligi boıynsha normatıvtik-quqyqtyq aktilerge ózgerister engizý qajet bolady», - dep atap ótti birinshi vıtse-premer.
Óz kezeginde Úkimet basshysy Kárim Másimov birinshi orynbasaryna jumysqa ornalastyrylatyn munaıshylardyń tizimin ázirleýdi tapsyrdy. «Men óz erkimmen barlyq qajetti sheshimderdi qabyldaımyn. Bul basty másele. Biz búgin, tipti bolmaǵanda erteń tańerteń qajetti sheshimderdi qabyldaıyq. Memlekettik kásiporyndarǵa qatysty sheshimdi qabyldaımyz, al memlekettik emes kásiporyndarǵa qatysty barlyq máselelerdi erikti-májbúrli túrde qabyldaıtyn bolamyz», - dedi Premer-Mınıstr.
