Jumystan qýylǵan aqtóbelik polıtseıler Bas prokýratýradan arasha surady
AQTÓBE. QazAqparat - Aqtóbe qalasyndaǵy Elek polıtsııa bóliminiń bastyǵy, orynbasarlary, tergeý bólimi bastyǵynyń orynbasary, birneshe tergeýshi bir jyl buryn jumystan shyǵaryldy. Endi olar zańsyz jumystan shyǵarylǵandaryn aıtyp, Bas prokýratýradan arasha surady, dep habarlaıdy QazAqparat tilshisi.
2016 jyldyń sáýir aıyndaǵy qyzmettik tekserýden soń bir mezetti 150 polıtsııa qyzmetkerinen turatyn Elek polıtsııa bóliminde 9 adam jumystan shyǵaryldy. Olardyń arasynda Elek polıtsııa bóliminiń bastyǵy Erbol Ismýrzın, tergeý bólimi bastyǵynyń orynbasary Manas Sýıesov pen taǵy 7 qyzmetker bar. Barlyǵy 4 bastyq men tórt tergeýshi jumystan shyǵaryldy.
«Ótken jyldyń sáýir aıynda oblystyq Іshki ister departamentiniń Elek polıtsııa bóliminde kúdikti tulǵalary bar ister boıynsha sot aldy tergeý merzimin buzý faktisine qatysty qyzmettik tekseris júrgizildi. Nátıjesinde Elek polıtsııa bóliminiń jedel qyzmetindegi olqylyqtar úshin bólim bastyǵy men birneshe qyzmetkerge qatysty ishki ister organyndaǵy qyzmetinen bosatý týraly tártiptik jaza qoldanyldy. Olar sotqa shyǵymdandy. Sot azamattardyń aryzyn qanaǵattandyrǵan joq», - dedi ІІD baspasóz qyzmeti jetekshisiniń mindetin atqarýshy Nurgúl Qonaqbaeva.
Búginge deıin appelıatsııalyq, kassatsııalyq sottarǵa shaǵym túsirip, barlyq satyda jeńilip qalǵan burynǵy polıtsııa qyzmetkerleri Bas prokýratýradan arasha surap otyr.
«2016 jyly general Mahsýdhan Ablazımovtyń (Aqtóbe oblystyq ishki ister departamentiniń burynǵy bastyǵy - red.) buıyryǵymen Elek polıtsııa bóliminiń bastyǵy, eki orynbasary, eki bólim bastyǵynyń orynbasary, tórt tergeýshi jumystan shyǵaryldy. Onyń bári negizsiz dep aıtamyz. Tek bizdi jumystan shyǵaryp, ózgeleri jumys oryndaryn saqtap qaldy. Bul ádiletsizdik. Men joǵary oqý ornyn bitirip, magıstratýrany támamdadym. 2015 jyldyń qańtar aıynda attestatsııadan ótip, 2016 jyldyń sáýirinde jumystan shyǵaryldym»,- dedi burynǵy Elek polıtsııa bóliminiń bastyǵy Erbol Ismýrzın.
18 jyldyq eńbek ótili bar, áke jolyn qýyp, tergeýshi bolǵan Manas Sýesov ta bir jyldan beri jumyssyz júr.
«Biz Іshki ister mınıstrligine aryz jazǵan kezde, qylmystyq ister boıynsha adamdardy jaýapqa tartpady, qylmystyq isti sotqa deıingi tergeý ýaqytyn uzartty dep jaýap keldi. Ondaı bolmady. Qylmystyq isterdiń keıbiri qysqartyldy, keıbiri boıynsha tergeý júrip jatty. Men 18 jyl boıy tergeýshi bolyp jumys istedim. Qalalyq ishki ister basqarmasynyń tergeý bóliminde tergeýshi boldym, bólim bastyǵynyń orynbasary qyzmetine deıin kóterildim. Meniń qaramaǵymdaǵy tergeýshiler qatelesti, men jazalandym. Al eki birdeı orynbasary munaı urlyǵy faktisi boıynsha kúdikke iligip, qamaýǵa alynǵan soń, general Mahsýdhan Ablazımov nege jaýapkershilikke tartylmaıdy? Ol nege jaýap bermeıdi? Zań bárine ortaq emes pe?» - dedi Elek polıtsııa bólimindegi tergeý bólimi bastyǵynyń orynbasary bolǵan Manas Sýesov.
Polıtsııa qyzmetkerleri bir jyl boıy sotqa shaǵym túsirip, eki apta buryn olar jumysqa qaıta ornalasý úmitinen aıyrylǵan. Olardyń ata-analary da Іshki ister mınıstrligine aryz jazǵan. Bári «zańdy jumystan shyǵaryldy» dep otyr. Amaly taýsylǵan burynǵy polıtsııa qyzmetkerleri búgin Bas prokýratýra men Prezıdentke aryz jazyp, kómek suraıtyndaryn jetkizdi.
«Men «20 jyl minsiz qyzmet etkeni úshin» tósbelgisimen marapattaldym. Birer aıdan soń jumystan shyǵardy. Bul ádiletsiz. Men qaıta jumysqa turǵym keledi», - dedi Manas Sýesov.
Aıta keteıik, Elek polıtsııa bóliminiń 9 qyzmetkerine qatysty ótken jyldyń sáýir aıynda Qylmystyq kodekstiń «Qyzmettegi áreketsizdik» baby boıynsha is qozǵalyp, keıin Qylmystyq-protsestik kodekstegi «Іs boıynsha is júrgizýdi bolǵyzbaıtyn mán-jaılar» babynyń «is-árekette qylmystyq quqyq buzýshylyq quramynyń bolmaýy» tarmaǵy boıynsha qylmystyq is qysqartyldy.
