Jumyssyzdyq monoqalalardyń basty problemasy bolyp tur - Úkimet otyrysy
ASTANA. 10 qyrkúıek. QazAqparat - Búginde jumyssyzdyq máselesi kóptegen monoqalalardyń basty problemasy bolyp otyr. Úkimettiń búgingi otyrysynda QR Óńirlik damý vıtse-mınıstri Qaıyrbek Óskenbaev osy máseleni kóterdi.
Onyń aıtýynsha, jumystyń bolmaýy saldarynan halyqtyń basym bóligi ózin-ózi jumyspen qamtyp júr. «Jumyssyzdyq deńgeıiniń joǵary kórsetkishteri Arqalyqta - 9,4 paıyz, Kentaýda - 8,7 paıyz jáne Aqsý qalasynda 7,9 paıyz tirkelgen. Bul respýblıka boıynsha ortasha kórsetkishten joǵary bolyp tur. Budan basqa, kóptegen monoqalalarda ekonomıkalyq belsendi, ıaǵnı eńbekke qaýqary bar halyqtyń úshten bir bóliginen astamy ózin-ózi jumyspen qamtıtyndardyń sanasyna jatady. Osy kórsetkish jaǵynan Qarataý (49,7 paıyz), Arqalyq (49,3 paıyz), Jitiqara (47 paıyz), Jańatas (37,1 paıyz) jáne Qulsary (30,7 paıyz) kósh bastap tur», - dep atap kórsetti Q. Óskenbaev. Vıtse-mınıstr atap kórsetkendeı, monoqalalardy damytý aıasynda atalǵan máselelerdi sheshý kózdelip otyr. Osy maqsatta 2013 jylda 18,18 mlrd. teńge bólingen. Búginde bul qarajattyń 54 paıyzy, nemese 10 mlrd. teńgesi ıgerildi.
