Jumyssyz júrgen jastar úshin bos oryndar jármeńkesi ótýde

ASTANA. 30 qazan. QazAqparat - Elordada Jumyspen qamtý jáne áleýmettik baǵdarlamalar basqarmasynyń uıymdastyrýymen Jumyspen qamtý ortalyǵynda jumyssyz jastarǵa arnalǵan bos oryndar jármeńkesi ótip jatyr. Bul týraly atalǵan vedomstvonyń baspasóz qyzmetinen habarlady.

Bos laýazymdar jármeńkesi bul - birneshe saǵat ishinde ondaǵan jumys berýshimen suhbattasatyn jumyssyzdarǵa óte qolaıly múmkindik, deıdi ortalyqtaǵylar.

«Búgingi jármeńkege 15-ten artyq jumys berýshi shaqyryldy. Mysaly, elordalyq ІІD kúzet salasynan 200 bos oryn usynyp otyr, budan basqa, bala baqshalar tárbıeshiler men kómekshiler izdeýde, qurylys uıymdary kóptegen bos oryndar usynyp otyr», - dedi Astana qalasy ákimdiginiń «Jumyspen qamtý ortalyǵy» QMK qabyldaý jáne jumysqa ornalastyrý bóliminiń basshysy Aıajan Qazkeeva.

«Bul bıyl ótkizilip otyrǵan 12-shi jáne sońǵy bos oryndar jármeńkesi, ol arnaıy jastar úshin ótkizilip otyr. Sonymen qatar, 9-11 synyp oqýshylaryna arnalǵan kásibı baǵyttaý jumystary qolǵa alyndy. Onda qazirgi kezde naryqta qandaı mamandyqtarǵa suranys kóp ekeni túsindiriledi», - deıdi Aıajan Qazkeeva.

Uıymdastyrýshylardyń aıtýynsha, jármeńkede Jumyspen qamtý ortalyǵynyń mamandary túrli suraqtar boıynsha keńes berýde. Olar qaıta oqytý jáne jańa mamandyq alýdyń múmkindikteri, oqý oryndarynyń túlekterine jastar tájirıbesinen ótý múmkindikteri jáne jalpy Jumyspen qamtý 2020 jol kartasy baǵdarlamasy sheńberindegi basqa da memlekettik qoldaýlary týraly aıtady. Bul týraly astana.kz habarlady.