Jumyssyz jastarǵa SMS arqyly jumysqa ornalasý múmkindikteri habarlandy

ASTANA. QazAqparat – Eńbek jáne halyqty áleýmettik qorǵaý mınıstrligi 23-35 jas aralyǵyndaǵy 25 myńnan astam jumyssyz jasqa jumysqa ornalasý múmkindigi týraly SMS habarlamalar joldady. Bul týraly QazAqparat vedomstvonyń baspasóz qyzmetine silteme jasap habarlaıdy.

Aatap aıtqanda, jastar bir mezgilde jumys izdeý, tegin oqý jáne jumyspen qamtý salasyndaǵy memlekettik qoldaýdyń basqa da sharalary týraly habardar etilgen.

Aıta ketsek, elimizdiń árbir azamaty Enbek.kz portaly, halyqty jumyspen qamtý ortalyǵy nemese 1414 biryńǵaı baılanys ortalyǵy arqyly jumysqa ornalasý, jumysynan aıyrylýyna baılanysty áleýmettik tólem taǵaıyndaý jáne basqa da memlekettik qoldaý sharalary týraly keńes ala alady.

2023 jyldyń 1 qańtarynan bastap Qazaqstanda Otbasynyń tsıfrlyq kartasy engizilgen bolatyn. Ol memlekettik organdardyń aqparattyq júıeleriniń derekteri negizinde memlekettik qoldaý alýǵa quqyly azamattardy anyqtap, olarǵa proaktıvty formatta kómek kórsetýge múmkindik beredi.