Jumyssyz jastar dalalyq lagerde áskerı mashyǵyn shyńdaı alady

TARAZ. QazAqparat – Búgin Jambyl oblysynda Gvardeısk garnızonyndaǵy Qurlyq áskerleriniń oqý ortalyǵynda 18-23 jas aralyǵyndaǵy densaýlyǵy jaǵynan áskerı qyzmetke jaramdy nemese shekteýli jaramdy jastardyń jıyny bastaldy. Oǵan Almaty, Jetisý oblystarynan 30 adam shaqyryldy, dep habarlaıdy QazAqparat.

Áskerı-dalalyq lager Almaty qalasy Jastar saıasaty basqarmasynyń jáne Qorǵanys mınıstrliginiń qoldaýymen «Almaty» stýdentter Alıansy» korporatıvtik qorynyń uıymdastyrýmen «Jiger» jastardy áskerı-patrıottyq tárbıeleý boıynsha is-sharalar keshenin ótkizý» jobasy aıasynda uıymdastyrylǵan.

«Almaty» stýdentter Alıansynan» málim etkendeı, joba tuńǵysh ret pılottyq joba retinde Almaty qalasy jáne Jetisý oblystarynda júzege asyrylyp otyr. Tańdalǵan 30 jastyń barlyǵy eńbekpen qamtylmaǵan.

Qorǵanys mınıstrliginiń aqparatyna súıensek, is-shara jastardy áskerlerdiń tynys-tirshiligimen tanystyrýǵa, áskerı qyzmet jáne áskerı is týraly bilim alýǵa, patrıottyq sanany qalyptastyrýǵa baǵyttalǵan.

Jıyn barysynda tartylǵan kontıngent jaýyngerlik tehnıkamen jáne qarý-jaraq túrlerimen tanysady. Komandırlerdiń basshylyǵymen oqý-jattyǵý is-sharalary barysynda jastar áskerı bólimder men áskerlerdi jaýyngerlik tártipke keltirý rettiligin zerdeleıdi. Áskerı taktıka negizderin meńgeredi. Sabaqtar 10 shildege deıin jalǵasady.

Áskerı-dalalyq lagerdiń ashylý saltanatyna QR Qorǵanys mınıstrligi men QR Qarýly kúshteriniń ókilderi, qol kúresinen álem chempıony Temir Spataı, «Alash arlandary» qozǵalysynyń tóraǵasy Ermek Alban, joba koordınatory Baǵlan Shaqapuly, jýrnalıster qatysty.

«Mundaı jıyndar alǵash ret ótkizilip otyr. Іs-sharalar Memleket basshysy Qasym-Jomart Toqaevtyń qazirgi zamanǵy syn-qaterlerdi eskere otyryp, áskerı-patrıottyq tárbıe júıesin jańǵyrtý jónindegi tapsyrmalaryn iske asyrý sheńberinde uıymdastyryldy. Jastardy qabyldaýda bizge qorǵanys isteri jónindegi departamentter, ákimdikterdiń jastar saıasaty basqarmasy jáne óńirlerdiń qoǵamdyq qurylymdary járdemdesti», – dedi áskerı-dalalyq lagerdiń bastyǵy, gvardııa podpolkovnıgi Baqytjan Seralıev.

Joba koordınatory Baǵlan Shaqapulynyń aıtýynsha, jastarǵa áskerı-patrıottyq tárbıe berý –i memlekettik jastar saıasatynyń bir bóligi.

«Búgingi áskerı-patrıottyq lagerimizge jastardy qoldap kelgenderińizge alǵysymyz sheksiz. Osyndaǵy árbir jas sarbazǵa general aǵalarynyń Otan úshin oılanbastan jasaǵan erlikteri men ómir joly qashan da úlgi, Qarýly kúshter qatarynda taısalmaı qyzmet etetinder úshin baǵdar bolyp qalatyny sózsiz. Jas býyndy otansúıgishtikke tárbıeleý barysynda bizben birge bolǵanyńyzǵa qýanyshtymyz.

Iıa, jastarǵa áskerı-patrıottyq tárbıe berý – bul elimizdegi memlekettik jastar saıasatynyń bir bóligi. Óz eliniń patrıoty bolý – óziniń ar-namysy jáne jeke qadir-qasıeti bar kez kelgen adam úshin árqashan qurmet», - dedi B.Shaqapuly.

Aıta keteıik, aldaǵy 17 shilde men 25 tamyz aralyǵynda Almaty qalasy men Jetisý oblystarynda turatyn 24 jastan joǵary jastar úshin jıyndar ótkizý jalǵaspaq. Osylaısha taǵy 60 adam áskerı mamandyqty ıgeretin bolady. Olar Taldyqorǵan jáne Almaty áskerı-tehnıkalyq mektepteri fılıaldarynyń bazasynda oqýdan ótedi.

Eske salaıyq, Prezıdent Q.Toqaev bıyl Túrkistan qalasynda ótken Ulttyq quryltaıda óskeleń urpaqtyń tárbıesi óte mańyzdy másele ekenin atap ótken bolatyn. Sondaı-aq patrıottyq uıymdar jumysyn jandandyrý qajettigi atap ótildi.