Jumysshylarynyń qarsylyǵyna baılanysty McDonald's kompanııasy Chıkagodaǵy shtab-páteriniń qyzmetin ýaqytsha toqtatty
ASTANA. QazAqparat - McDonald's kompanııasy qyzmetkerleriniń jalaqy kóterýdi talap etken ereýiline baılanysty Chıkago qalasyndaǵy shtab-páteriniń jumysy ýaqytsha toqtady, dep habarlady VVS agenttigi.
Kompanııa basshylyǵy ofıs qyzmetkerlerine ýaqytsha úıden jumysty jalǵastyrýdy ótindi. Qarsylyq sharalary McDonald's aktsıonerleriniń beısenbige josparlanǵan jınalysy qarsańynda bastalyp otyr. Shtab-páter mańyna ereýilshiler shatyrlar tigip, eńbekaqyny saǵatyna 15 dollarǵa deıin kóterýdi talap etti.
Bul talap 2012 jyly alǵash ret restorandar jelisi qyzmetkerleri arasynda qoıylǵan. Al, bul qarsylyqty uıymdastyrýshylardyń aıtýynsha, búgingi, beısenbidegi ereýil sońǵy jyldary ótkizilgeli otyrǵan eń iri qarsylyq sharasy bolmaq.
Aıta keteıik, seısenbi kúni McDonald's kompanııasynyń burynǵy atqarýshy dırektory Ed Rensı Fox Business-ke bergen suhbatynda, osy máselege qatysty pikirin bildirgen. Onda ol ereýilshilerdiń talaby, ıaǵnı jalaqyny saǵatyna 15 dollarǵa deıin kóterý - kompanııa úshin tıimsiz ekenin aıtqan. Onyń aıtýynsha, McDonald's basshylyǵy úshin bul talapty oryndaǵannan góri jumysshylardy robottarǵa aýystyrǵan paıdalyraq.
Assoshıeıted press agenttiginiń habarlaýynsha, McDonald's kompanııasynyń bıylǵy alǵashqy toqsandaǵy paıdasy 1,1 mlrd dollarǵa jetti.
