Jumysshylarǵa mıllıondaǵan qaryzy bar ınvestor shetel asyp ketti

Aqtóbe oblysy, Hromtaý aýdanyndaǵy 100-den astam jumysshy 6 aıdan beri jalaqy almaǵan. «Shaft Sınkers» JShS-y olarǵa 110 mıllıon teńge bereshek. Bas dırektory 70 mıllıon teńge qaryzdy qaıtara almaı otyr. Reseılik ınvestor «QazHrom» TUK» AQ-na tıesili shahtanyń qurylysyn óz mindetine alǵanymen, jumysty aıaqtamaǵan. Jumysshylardyń máselesimen tanysqan oblystyq eńbek ınspektsııasy basqarmasy eki ret tekserý júrgizip, eskertý berdi. Qazir is sotqa túsip, jumysshylar eńbekaqysyn sot arqyly daýlap jatyr.

«Bul kompanııanyń problemasy 2016 jyldyń tamyz aıynda bastaldy. Hromtaý aýdandyq prokýratýrasy men eńbek ınspektsııasy basqarmasy birlese jumys istep, eki ret tekserý júrgizdi. Eńbek qatynastarynyń talaptaryn buzyp, jumysshylaryna ýaqytyly jalaqy tólemegen kompanııaǵa 800 myń teńge aıyppul salyndy. Qazir is sotqa jetip, azamattyq shaǵym qarala bastady»,- dedi oblystyq eńbek ınspektsııa basqarmasy basshysynyń orynbasary Baýyrjan Orazaev.

2014 jyly jumysqa ornalasyp, eki jyl boıy esh qıyndyq kórmegen gaz-elektr dánekerleýshi Pavel Sajın sońǵy alty aıda isherge tamaq tappaı otyr. Ol bir óziniń 830 myń teńge aılyǵy tımegenin málim etti.

«2016 jyldyń tamyz aıynan bastap eńbekaqy alǵanymyz joq. Olar kúnde erteń dep aldap, qańtarǵa deıin ýáde berip keldi. Shydamymyz taýsylǵan soń aýdandyq prokýratýraǵa aryz jazyp, tergeý jumystary bastalyp ketti. Kóp adamnyń nesıesi bar, tipti páter jaldap turady. Men qazir páterdemin, aqsha tóleı almaı otyrmyn. Óte qıyn. Jergilikti ákimdik jumys usyna qoıǵan joq. Ózim izdeýge kiristim»,- dedi P.Sajın.

«Shaft Sınkers» JShS-nyń quryltaıshysy Qazaqstan aýmaǵynda joq, ol Reseı asyp ketken. Al jeke sot oryndaýshylary kompanııa múlkin baǵalaýǵa kiristi. Aldaǵy ýaqytta múlik satylyp, qarjy jumysshylardyń eńbekaqy qaryzyn óteýge jumsalady.