Jumysshylardy bopsalaǵan kompanııa qyzmetkeriniń ústinen qylmystyq is qozǵaldy

 QYZYLORDA. QazAqparat-«Sıbý Qyzylorda» JShS ınjenerlik burǵylaý kompanııasy jumysshylarynyń aryzynan keıin kadr bóliminiń basshysy Álııa Egemberdıeva jumystan shettetildi. Oǵan Qylmystyq Kodekstiń eki baby boıynsha aıyp taǵylyp otyr, dep habarlady QazAqparat tilshisi.

 Óńirlik kommýnıkatsııa ortalyǵynda ótken brıfıngte oblystyq ishki ister departamenti bastyǵynyń orynbasary Nurlan Anarbaev jumysshylardyń polıtsııaǵa toptasyp aryzdanǵanyn jetkizdi. Jumysshylar kompanııada talaı jyldan beri kadr bólimin basqarǵan Álııa Egemberdıevanyń vahtalyq jumysqa jiberý úshin ózderinen ártúrli kólemde aqsha talap etkenin kórsetken.

 «Egemberdıevaǵa qatysty alaıaqtyq jasady jáne zańsyz syıaqy aldy degen aıyp taǵyldy. Fakt boıynsha qylmystyq is qozǵalyp, tergeý júrgizilip jatyr», - dedi N.Anarbaev.

 «Sıbý Qyzylorda» seriktestiginiń 46 jumysshysy oblystyq eńbek salasyndaǵy baqylaý basqarmasyna da júgingen. Onda da negizgi ýáj - kadr bólimi basshysynyń zańǵa qaıshy tirligi.

- Sonymen qatar olar eńbek demalysy kezinde beriletin aqynyń keshiktirilip jatqanyn, vahtalyq jumysqa jiberý kestesiniń jasalmaǵanyn alǵa tartty. Bul máseleler retteldi, - dedi basqarma basshysynyń orynbasary Tumar Shalbaeva.

Brıfıngte kompanııa basshysy Van Dosıa jáne osy kompanııa jumysshylarynyń as-aýqatyna jaýapty «AltaıTorgServıs» JShS-niń bólim basshysy Berikbol Jetkergen kásiporynda qazaqstandyqtar men sheteldikter tutynatyn tamaq máziri eki túrli bolǵanymen, baǵasy birdeı ekenin jetkizdi.