Jumysshylar jaıy jiti baqylanýy kerek – «ArselorMıttal Temirtaý» basshysyna ótinish joldandy
NUR-SULTAN. QazAqparat – QR Kásipodaqtar federatsııasy tóraǵasynyń birinshi orynbasary Muhtar Tinikeev «ArselorMıttal Temirtaý» basshysyna ótinish joldady. Onyń aıtýynsha, Qaraǵandy kómir basseınindegi jaǵdaı jiti baqylaýǵa alynýy kerek, dep habarlaıdy QazAqparat tilshisi.
«Qazmyrysh (Kaztsınk kompanııasy) týraly aıtaıyn: onda qyzmetkerler men olardyń otbasynyń densaýlyǵyna basa mán berilip otyr. Kásiporynda sanıtarlyq óńdeý jumystary kúsheıtilip, jumystaǵy personal gıgıena quraldarymen qamtylǵan. Іssaparlar men jınalystar toqtatylǵan. Kásiporyndaǵy sharalardyń bári shektelgen. Keńse qyzmetkerleri qashyqtan jumys isteý tártibine kóshirilgen. Qyzmetkerlerdi jumysqa arnaıy avtobýstar ákeledi. Qazir iri kásiporyndardyń kóbi óz qyzmetkerleri úshin arnaıy avtobýs shyǵaryp jatyr. Ashanalarda tamaq ishý úrdisi de toqtaǵan. Arnaıy lanch-bokstar arqyly tamaq taratady. Kásiporyndaǵy qyzmetkerleri gıgıena saqtaý týraly únemi eskertiledi. Baqylaý-ótkizý beketterinde baılanyssyz dene qyzýyn tekserý kesheni ornatylýda. Máselen Qaraǵandydaǵy YDD ferroqorytpa zaýyty men Qaz Carbon kompanııalary osy apparattardy satyp alyp qoıǵany týraly maǵan fotosýretterin jiberdi. Jumys ornyna kirgen azamattyń dene qyzýy avtomatty túrde kórsetiledi. Dene qyzýy 37 gradýstan asyp tursa – qyzyl sıgnal berilip, jumysshynyń aýyryp turǵany kórinedi», - dedi Muhtar Tinikeev OKQ-da ótken baspasóz máslıhatynda.
Onyń aıtýynsha, Qazmyrysh kompanııasyndaǵy qyzmetkerler men olardyń otbasylaryna 100 myń maska, táýlik boıynsha jumys isteıtinder úshin 120 avtıbakterıaldy sham taratylǵan.
«Eger kásiporyn óz qyzmetkerleriniń áleýmettik jaı-kúıin taldap bilip otyrsa, onda aýrý juqtyrǵandar da az bolady. Osy jıynnyń aldynda ǵana shahtalardyń birindegi kenshimen sóılestim. «Qaldaryńyz qalaı?» desem, «Naýqastar kóp» deıdi. Shahtaǵa túsetin bes kisiniń ornyna úsh adam túsedi eken. Al karantınge baılanysty jańa jumysshylar qabyldanbaı jatyr. Osy jıyndy paıdalana otyryp, «ArselorMıttal Temirtaý» kompanııasyna ótinish joldaǵym keledi: Qaraǵandy kómir basseınindegi jaǵdaıdy jiti baqylaýǵa alynsa deımin», - dedi ol.
