Jumysshylar Teńiz kenishindegi blokpostan PTR anyqtamasyz ótpek bolǵan
ATYRAÝ. QazAqparat –Atyraý oblysyndaǵy Teńiz ken ornyna kelgen jumysshylar blokpostan PTR anyqtamasyz ótpek bolǵan, dep habarlaıdy QazAqparat.
Jylyoı aýdandyq polıtsııa bólimi Teńiz polıtsııa bólimshesiniń qyzmetkerleri ken ornyndaǵy blok beketti aınalyp ótýge tyrysqan bir top adamnyń jolyn kesti. Atalǵan bólimsheniń patrýldik polıtsııa ınspektory, polıtsııa kapıtany Tileýke Qumarov blok beketti aınalyp, ken ornyna qaraı bet alǵan «Lada Granta» avtokóligin kórgen. Sol boıda basshylyqqa habarlap, ózi toqtatý úshin atalǵan kólikke bet alǵan. Sol baǵytqa onyń áriptesteri de jolǵa shyqqan.
«Polıtseıler Qulsary qalasynda turatyn 31 jastaǵy azamattyń basqarýyndaǵy kólikti vahtalyq kentke kireberiste toqtatty. Júrgizýshiden ózge salonda tórt er adam bolǵan. Olardyń ekeýi Orynbor qalasynda turatyn Reseı azamattary bolyp shyqty. Qujattardy tekserý kezinde úsh jolaýshynyń, onyń ishinde bir reseılik azamattyń qolynda PTR-testten ótkendigi týraly anyqtama bolmaı shyqty. Kóliktegiler «Teńiz» vahtalyq kenti aýmaǵynda ornalasqan kompanııalardyń birine barýdy kózdegen» -dep habarlady oblystyq polıtsııa departamentiniń baspasóz qyzmeti.
Qazir jınaqtalǵan qujattar tıisti sheshim qabyldaý úshin aýdandyq sanıtarlyq-epıdemıologııalyq qadaǵalaý bólimine joldandy.
Eske sala ketelik, budan buryn Teńiz kenishine jumysshylar jalǵan PTR anyqtamamen kelgenin habarlap edik.
