Jumysshy mamandyǵyn alyp jatqan stýdentterdiń shákirtaqysy qansha teńgege ósedi
NUR-SULTAN. QazAqparat - 2019 jyldyń 1 qyrkúıeginen tehnıkalyq jáne kásiptik bilim alyp jatqan stýdentterdiń shákirtaqysy 21 787 teńge bolady. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«2017 jyldan bastap Elbasynyń tapsyrmasyna sáıkes barshaǵa arnalǵan tegin tehnıkalyq jáne kásiptik bilim jobasy júzege asyrylýda. Jumysshy mamandyqtary boıynsha búginde kolledjderde 122 myń stýdent oqyp jatyr. Olarǵa ótken jyldan bastap birjolǵy ystyq tamaq beriledi jáne jylyna 2 ret jol júrý shyǵyny óteledi», - dedi mınıstr.
Sondaı-aq onyń dereginshe, atalǵan 122 myń stýdentke 16 759 teńge kóleminde shákirtaqy qarastyrylǵan.
«Stýdentterdiń 70 paıyzy áleýmettik jaǵynan az qamtylǵan otbasylardan shyqqan balalar ekendigin atap ótkim keledi. Stýdentterdi qoldaý úshin Memleket basshysy sháikirtaqyny 30 paıyzǵa kóterý jóninde tapsyrma berdi. Soǵan oraı jańa oqý jylynan bastap shákirtaqy kólemi 21 787 teńgeni quraıtyn bolady», - dedi Ashat Aımaǵambetov.
