Jumyspen qamtýǵa bólingen qomaqty qarjy qumǵa sińgendeı joq bolmaýy tıis - Toqaev

NUR-SULTAN. QazAqparat - «Jumyspen qamtý jol kartasy» baǵdarlamasyna bólingen qomaqty qarjy qumǵa sińgendeı joq bolmaýy tıis. Bul týraly Tótenshe jaǵdaı rejımin qamtamasyz etý jónindegi memlekettik komıssııanyń otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Halyqty jumyspen qoldaý úshin «Jumyspen qamtý jol kartasy« baǵdarlamasy qabyldandy. Onyń aıasynda vırýstan keıingi kezeńde shamamen 240 myń jumys orny qurylady. Ony júzege asyrýǵa teńdessiz soma (1 trln teńgege deıin) bólinedi. Buǵan deıin birneshe ret oryn alǵandaı, bólingen qarjynyń qumǵa sińip ketpeýi barynsha mańyzdy. Sondyqtan Úkimet pen ákimder qazaqstandyq kadrlardy, otandyq qurylys kompanııalary men qurylys materıaldaryn óndirýshilerdi tartýy mańyzdy», - dedi Memleket basshysy.

Osy rette QR Prezıdenti josparlanǵan jumys oryndarynyń basym bóligi ýaqytsha ekendigine basa nazar aýdardy.

«Baǵdarlama aıaqtalǵannan keıin turaqty jumyspen tek qana 13 myń adam qamtamasyz etiletin bolady. Birqatar óńirde baǵdarlama qorytyndysy boıynsha turaqty jumys oryndarynyń saýsaqpen sanarlyqtaı sanyn qurý josparlanǵan. Jumyspen qamtýdyń eki túri arasyndaǵy balansty qamtamasyz etý qajet. Daǵdarys kezinde ýaqytsha jumysqa ornalasý mańyzdy. Biraq, barynsha keń ári sapaly jumys oryndarynyń keleshegi jaıynda da oılaý qajet», - dedi Q.Toqaev.