«Jumyspen qamtýdyń jol kartasyn» júzege asyrý úshin qosymsha qarjy bólinedi

NUR-SULTAN. QazAqparat – Daǵdarysqa qarsy sharalardyń jalpy paketi salyqtyq preferentsııalar men jergilikti deńgeıdegi qoldaýdy qospaǵanda 5,9 trln teńgeni quraıdy. Bul týraly Ortalyq kommýnıkatsııalar qyzmetinde ótken QR Úkimetiniń rezervinen qarajat bólý máselesine arnalǵan baspasóz konferentsııasynda aıtyldy, dep habarlaıdy QazAqparat tilshisi.

«Memleket basshysynyń tapsyrmalaryna sáıkes Úkimet ekonomıkalyq jáne áleýmettik turaqtylyqty qoldaýǵa baǵyttalǵan daǵdarysqa qarsy sharalardy ázirledi jáne qabyldap otyr», - deıdi QR Qarjy mınıstrliginiń birinshi vıtse-mınıstri Berik Sholpanqulov.

Onyń aıtýynsha, daǵdarysqa qarsy sharalardyń jalpy paketi salyqtyq preferentsııalar men jergilikti deńgeıdegi qoldaýdy qospaǵanda 6 trln teńgeni quraıdy.

«Onyń ishinde 2,5 trln teńge bıýdjetten tys qarajattan, 3,5 trln teńge respýblıkalyq bıýdjetten bólinedi. Osylaısha úsh baǵyt boıynsha qarjylandyrý júzege asady dep josparlanýda. Birinshiden, ekonomıkalyq turaqtylyqty jáne tótenshe jaǵdaı rejımin qamtamasyz etý úshin 1,2 trln teńge qarastyrylǵan. «Jumyspen qamtýdyń jol kartasyn» júzege asyrýǵa bıýdjetten 300 mıllıard teńge bólinedi. Infraqurylymdyq jobalar iske asyrylyp, 250 myń jumys orny ashylady. «Jumyspen qamtýdyń jol kartasyn» júzege asyrý úshin qosymsha 84,5 mlrd teńge bólý josparlanǵan. Kásipkerlerge qaryzdardy sýbsıdııalaý jáne kepildendirý arqyly kásipkerlikti qoldaý sharalaryn kúsheıtý qarastyrylǵan. Bul shamamen 16 myń jumys ornyn qurýǵa jáne 250 mlrd teńgeden astam salyqtyq túsimge qol jetkizýge múmkindik beredi», - deıdi ol.

Sondaı-aq, azamattardyń jekelegen sanattaryna 5 567 teńge turatyn azyq-túlik jáne turmystyq jıyntyqtarmen qamtamasyz etýge 30,8 mlrd teńge qarastyrylǵan. Bul shara 2 mıllıonnan astam adamdy qamtıdy.