Jumyspen qamtýdyń jol kartasy múmkindikterin keńinen paıdalaný kerek - elorda turǵyny
Astana turǵyny Qýat Qamyshev 44 jasta. 1997 jyly mal dárigeri mamandyǵy boıynsha Agrarlyq ýnıversıtetti támamdaǵan. Osyǵan deıin qurylys salasyndaǵy kompanııada jumys istegen. Alaıda, qysqartýǵa baılanysty jumyssyz qaldy. Úsh aı jumyssyz júrgennen keıin, 2016 jyldyń 7 maýsymynda Astananyń Jumyspen qamtý ortalyǵyna ótinish joldap, eki kúnnen soń «Eńbek Aqmola» RMK-ǵa jumysqa joldama alyp, esepshi-tizimshi qyzmetine turdy.
«Iá, kóp kútpeı jumys usynyldy, qazirgi kezde tizimshi qyzmetin atqarýdamyn. Atap aıtqanda, jańa jumysyma kiriskenime kóp ýaqyt óte qoıǵan joq, degenmen de osy istep júrgen jumysym ózime unaıdy. Aldaǵy ýaqytta da qyzmetimdi osy kásiporynmen baılanystyrǵym keledi. Osy rette ózimniń biliktiligimdi shyńdap, jumysymda jetistikterge jetý maqsatyn kózdep otyrmyn», - dep atap ótti Qýat Ánýarbekuly.
Sonymen qatar ol óz sózinde jumyssyz azamattar jumyspen qamtý ortalyǵyna baryp, usynylǵan jumystarǵa tartynbaı kirisip ketýge keńes berdi.
Aıta keteıik, 2016 jyldyń 1 maýsymyndaǵy jaǵdaı boıynsha «Jumyspen qamtýdyń jol kartasy - 2020» baǵdarlamasyn júzege asyrýǵa 100,8 mlrd. teńge bólinip, 149 jobany iske asyrý bastaldy. Osy rette 1938 jumys orny qurylyp, onyń ishinde 913-i baǵdarlama qatysýshylary. Osy baǵdarlama aıasynda 56 677 adamǵa jumysqa turýǵa kómek jasalyp, onyń arasynda turaqty qyzmetke 37 920 adam ornalasty.
Baǵdarlamaǵa qatysýshylar ishinde jumysssyzdar - 39,8 myń adam (70,2 paıyz), ózin-ózi jumyspen qamtyǵandar - 16,3 myń (28,7 paıyz), ishinara jumyspen qamtylǵandar - 586 (1 paıyz), sondaı-aq olardyń arasynda az qamtylǵandar - 2267 adam, múgedekter - 1822. Munymen qosa, 29 jasqa deıingi jastardyń úlesi 48 paıyz (27 069), áıelder sany 49 paıyz (27 581 ) deńgeıinde.
