Jumyspen qamtýdyń jol kartasy: Aqmolada 328 ınfraqurylym jobasy iske asyp jatyr

KÓKShETAÝ. QazAqparat - Aqmola oblysynda «Jumyspen qamtýdyń jol kartasy» memlekettik baǵdarlamasy sheńberinde jobalardy júzege asyrý jalǵasýda, dep habarlaıdy QazAqparat tilshisi oblystyq ishki saıasat basqarmasyna silteme jasap.

Baǵdarlama aıasynda óńirde 8 myńnan astam jumys ornyn qurýmen áleýmettik-mádenı nysandardy, turǵyn úı-kommýnaldyq sharýashylyqty jáne ınjenerlik-kóliktik ınfraqurylymdy jóndeý boıynsha 328 ınfraqurylymdyq joba iske asyrylýda.

Jaqynda Jaqsy aýdanynyń Chapaevskoe aýylyndaǵy bógetti jóndeý aıaqtaldy. Nysannyń qurylysyna 18 tehnıka men 24 jumysshy jumyldyryldy.

Aýdan ákimi Baýyrjan Málgajdarovtyń aıtýynsha, bóget eldi meken tirshiliginde erekshe ról atqarady.

«Bul bóget aýyl men jaqyn mańdaǵy eldi mekenderdiń turǵyndaryn aýyz sýmen qamtamasyz etýde mańyzdy nysan bolyp tabylady. Sonymen qatar, bóget kórshi aýyldy sý basý qaýpinen qorǵaýǵa múmkindik beredi», - deıdi B.Málgajdarov.

Baǵdarlama aıasynda oblystyń basqa aýdandarynda da aýqymdy jobalar júrgizilýde.

Şýchınsk qalasyndaǵy joǵary pedagogıkalyq kolledj jataqhanasynyń ǵımaratyna kúrdeli jóndeý jumystary aıaqtalý satysynda. Jóndeý jumystary barysynda munda 86 jumys orny quryldy, olardyń jartysyna jýyǵy jumyspen qamtý ortalyǵy arqyly.

Sondaı –aq, mamyr aıynyń ortasynan bastap uzyndyǵy 27 shaqyrym bolatyn «Zelenyı bor – Mádenıet» avtomobıl joldaryna ortasha jóndeý júrgizilýde, oǵan 5,5 myńǵa jýyq adam turatyn Zelenyı Bor, Molbaza, Qymyzynaı, Jańatalap, Mádenıet, Naýryzbaı batyr aýyldary kiredi. 4-shi tehnıkalyq sanattaǵy avtojol Şýche-Býrabaı kýrorttyq aımaǵyn damytý josparynyń úshinshi kezeńin iske asyrý sheńberinde jóndelýde. Ony paıdalanýǵa berý aýyl turǵyndary men jaqyn mańdaǵy eldi mekenderdiń turǵyndary úshin qolaıly jaǵdaılardy qamtamasyz etýge múmkindik beredi. Jóndeý jumystaryna 75 jergilikti turǵyn tartylǵan. Jobany kelesi jyly aıaqtaý josparlanýda.

Aıta keteıik, búgingi tańda Aqmola oblysynda 99 joba aıaqtalyp otyr.