Jumyspen qamtý jol kartasy: Jezqazǵanda myńnan astam jumys orny ashylady

QARAǴANDY. QazAqparat - Qaraǵandy oblysynyń ákimi Jeńis Qasymbek jumys saparymen Jezqazǵanda bolyp qaıtty. Óńir basshysy «Jumyspen qamtýdyń jol kartasy» jáne «Nurly jer» baǵdarlamalary boıynsha atqarylyp jatqan jumys barysymen tanysty, dep habarlaıdy QazAqparat tilshisi.

Jezqazǵanda osy jylǵa josparlanǵan úlken josparlar bar. Jergilikti bılik «Jumyspen qamtýdyń jol kartasy» baǵdarlamasynyń kómegimen nysandardy jóndeý jumystaryn qarqyndy júrgizip jatyr. Mysaly, áleýmettik mádenı turmystyq tórt nysandy, 58 kópqabatty turǵyn úıdiń qasbeti men shatyryn, 1,5 shaqyrymǵa jýyq káriz jáne sý qubyry jelilerin jańǵyrtý josparlanǵan. Qala joldary da qalys qalǵan joq. Atap aıtqanda, 1954 jyly salynǵan №4 jol ótpesin qalpyna keltirýge kiristi.

Budan basqa, eki saıabaq abattandyrylady, 800 jaryqtandyrý tirekteri ornatylady. Osynyń bárin júzege asyrý úshin jumys qoly qajet. Sondyqtan myńnan astam jumys orny ashylady.

«Jezqazǵanda Jumyspen qamtýdyń jol kartasy boıynsha jalpy somasy 3,9 mlrd teńge bolatyn 36 joba júzege asyrylýda. Onyń ishinde 33 ınfraqurylymdyq joba jáne úsheýi qurylys boıynsha», - dep habarlady Jezqazǵan qalasynyń ákimi Qaırat Begimov.

Jumyspen qamtýdyń jol kartasy boıynsha jóndeletin nysandardyń biri - Alǵashqy qurylysshylar alańyndaǵy sýburqaq. Ol úshin 15 jumys orny ashyldy.

«Biz Jezqazǵanda káriz jáne sýmen qamtamasyz etý júıesin jóndeý jumystaryn qolǵa aldyq. Bizge jumysshylar jetispedi, sondyqtan jumyspen qamtý ortalyǵyna júgindik. Olar bizge jeti adamdy jiberdi. Jumysshylardyń ortasha jalaqysy - 85 000 teńge», - deıdi «Medet» JK brıgadıri Eset Ábjalelov.

«Men úsh aı jumys izdep, taba almadym. Sodan keıin Jumyspen qamtý ortalyǵyna habarlastym. Ol jerde maǵan jumysqa turýǵa kómektesti. Endi sylaqshy-syrlaýshy bolyp jumys isteımin», - deıdi Sandýǵash Aznabaeva.

Jezqazǵanda qoljetimdi kópqabatty turǵyn úıler de kóbirek salyna bastady. Bıyl «Nurly jer» baǵdarlamasy boıynsha 158 páterlik tórt kópqabatty turǵyn úı paıdalanýǵa beriledi. Turǵyn úıdi áleýmettik qorǵalatyn sanattardan kezekte turǵandar alady.

Óńir basshysy jergilikti jerlerde barlyq jumystardyń sapasy men qarqynyn qatań baqylaýǵa alýdy tapsyrdy.

Sapar barysynda Jeńis Qasymbek 900 oryndyq jańa mektepti aralap kórdi. Aýlanyń aýmaǵyn abattandyrý, jıhaz, qural-jabdyqtar jetkizý ǵana qaldy. 1 qyrkúıekke qaraı nysan oqýshylarǵa esigin aıqara ashpaq.

Oblys ákimi sondaı-aq «KazTehFıltr», «ıÝtarııa ltd» jáne «Ulytay Nan» JShS-de bolyp, óndiristik úderispen jáne kásiporyndardy odan ári damytý jónindegi josparlarmen tanysty. Kompanııa basshylarymen kezdesýde otandyq taýar óndirýshilerdi qoldaý máseleleri de talqylandy.