«Jumyspen qamtý jol kartasy» aıasynda berilgen shaǵyn nesıe 87 myń adamdy qamtydy

ASTANA. QazAqparat - «Jumyspen qamtý jol kartasy» aıasynda berilgen shaǵyn nesıe 87 myń adamdy jumyspen qamtydy. Bul týraly búgin QR Parlamenti Senatynyń Áleýmettik-mádenı damý jáne ǵylym komıteti depýtattarymen kezdesý barysynda elimizdiń Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat.

«Jumyspen qamtý jol kartasy» baǵdarlamasy aıasynda 5 jyldyń ishinde 45 myń azamatqa shaǵyn nıese berdik. Olardyń 30 myńy alǵash ret óz isterin ashyp otyr. Qalǵan 15 myńy óz bıznesterin keńeıte tústi. Atalǵan 45 myń azamat taǵy da 42 myń jańa jumys ornynyń ashylýyna sebepker boldy. Sondyqtan biz osy nesıelerdi berý arqyly 87 myń jańa jumys ornyn ashtyq dep aıta alamyz. Óz bıznesterin ashý arqyly ol adamdarda turaqty kiris paıda boldy», - dedi mınıstr.

Onyń aıtýynsha, ónimdi eńbek pen jappaı kásipkerlikti damytýǵa baǵyttalǵan bul baǵdarlama aıasynda qala turǵyndary da shaǵyn nesıe alý múmkindigin ıe bolyp otyr. Endigi ýaqytta «Damý» kásipkerlikti damytý qor qala turǵyndaryn, al Aýyldaǵy kásipkerlikti damytý qory men «QazAgro» korporatsııasy aýyl turǵyndaryn nesıemen qamtamasyz etedi.

Esterińizge sala ketsek, jańa shaǵyn kásipkerlikti damytýǵa jáne jumys istep turǵan bıznesti keńeıtýge  bólinetin shaǵyn nesıe kólemi 16 mln. teńgege deıin arttyryldy. Qarjy azamattarǵa 7 jyl merzimge 6 paıyzdyq stavkamen beriledi.