Jumyspen qamtý: Jekemenshik kompanııalarǵa qandaı talaptar qoıylady
ASTANA. QazAqparat - Qazaqstanda jumyspen qamtý sharalaryn aýtsorsıng arqyly júrgizý josparlanyp otyr. Osyǵan oraı, jekemenshik kompanııalar da memlekettik tapsyrysty alyp, jumyspen qamtý sharalarymen aınalysady, dep xabarlaıdy QazAqparat tilshisi.
QR Eńbek jáne xalyqty áleýmettik qorǵaý vıtse-mınıstri Nurjan Áltaevtyń aıtýynsha, búginde jumyspen qamtý naryǵynda 300-den astam jekemenshik kompanııa jumys isteıdi.
«Buryn ondaı kompanııalar, kóbinese, basqa jumys ornyn qalaǵan, ıa bolmasa, jalaqysy joǵary qyzmet izdegen adamdarmen aınalysty. Bylaısha aıtqanda, jekemenshik jumyspen qamtý ortalyqtaryna kóp jaǵdaıda jumysy bar azamattar júgindi. Endi, memlekettik tapsyrysty alyp, aýtsorsıngke keletin kompanııalar jumyssyz azamattarmen jumys isteıtin bolady. Bas kezinde aýtsorsıngke kásibı biliktilikti arttyrý jáne jumyspen qamtý qyzmeti beriledi. Bıyl jekemenshik jumyspen qamtý ortalyqtary arqyly shamamen 60 myń adam jumysqa turady degen jospar bar», - dedi N.Áltaev Astanada ótken baspasóz máslıxatynda.
Onyń sózine qaraǵanda, aýtsorsıngke qatysamyn deıtin kompanııalardyń jumys tájirıbesine basa nazar aýdarylady.
«Mınıstrlik óz kezeginde bıýdjet esebinen xalyqty jumyspen qamtý salasyndaǵy tarıfterdi bekitedi. Osy sanattaǵy qyzmetter men aýtsorsıngti qarjylandyrý tártibin maquldaıdy. Budan bólek, jeke menshik kompanııalarǵa qoıylatyn talaptardy belgileıdi. Zań boıynsha jumyspen qamtý ortalyqtaryna bıýdjet aqshasy tólenedi. Al jumys izdep kelgen azamattarǵa barlyq qyzmetter tegin kórsetiledi», - dep atap kórsetti N.Áltaev.
Aıta keteıik, jumyspen qamtý máselelerine arnalǵan jańa zań jobasy boıynsha zeınetkerlikke jaqyndap qalǵan, biraq áli shyqpaǵan jumysshyny mazalaýǵa tyıym salynyp otyr. Budan bólek, atalǵan zań jobasy aıasynda oralmandarǵa bólek kvota beriletin bolady.
